Petropavl turǵyny quty qaqpaǵynan túrli kartına jasaıdy
PETROPAVL. QazAqparat – Petropavl qalasynyń turǵyny plastık qutylardyń qaqpaǵynan túrli kartına jasaýmen aınalysady, dep habarlaıdy QazAqparat tilshisi.
Vladıslav Voloshınniń bul isti qolǵa alǵanyna úsh jyl bolǵan. Osy aralyqta ol delfın, aqqý, átesh sekildi túrli janýardy beıneledi. Qazir kartına sany onnan asyp ketken. Attyń beınesi – onyń sońǵy jumysy.
«Bul kartınany on kúndeı jasadym. Tańǵy saǵat 5.00 turyp istegen kezderim de boldy. Áıelim «erikkensiń, tasta qaıtesiń» dep te urysty. Biraq maǵan qolónermen aınalysý óte unaıdy. Myna jumysqa eki myńnan astam qaqpaq jáne sonsha buranda jumsadym. Nátıjesi kóńilimnen shyqty», - deıdi ol.
Sheber áke qolónerge uldaryn da baýlyp júr. Kenjesi saımandaryn áperip tursa, úlkeni qaqpaqty túsine qaraı toptastyryp otyrady.
«Bul isti oılamaǵan jerden bastadym. Úsh jyl buryn taýyq jyly boldy da, biz balalarymmen osy jyldyń beınesin jasaýdy uıǵardyq. Ol úshin qarajat az ketetin, qoljetimdi materıal qajet edi. Plastık bótelkeniń qaqpaǵyn tańdadyq. Bul materıal aıaq astynda jatyr ǵoı. Keıin bizdiń bótelke qaqpaǵyn jınaıtynymyzdy estip tanystarym, týystarym, áriptesterim dorba-dorba qylyp ákeletin boldy. Qoqys polıgondarynan da jınaǵan kezimiz boldy», - deıdi Vladıslav.
Qala turǵyny bótelke qaqpaqtarymen esik aldyn da bezendirgen. Onyń aıtýynsha, joldy jasaýǵa 3 myń 700-ge jýyq qaqpaq jumsalǵan. Endigi armany – aq qaıyńdar arasynda turǵan meshit beınesin jasap shyǵý. Ol úshin qajet qaqpaqty jınaýdy bastap ta ketken.
