Petropavl turǵyny kósheden patrondar salynǵan paket taýyp aldy
PETROPAVL. QazAqparat – Petropavl turǵyny kósheden patron salynǵan paketti tapty. Oq-dári atýǵa jaramdy bolyp shyqty, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, 35 jastaǵy petropavldyq Ǵ.Músirepov pen Jambyl kósheleriniń qıylysynda oq-dárige uqsas zat salynǵan paket taýyp aldy. Er adam dereý polıtsııaǵa qońyraý shalyp, bolǵan oqıǵa týraly habarlady.
Oqıǵa ornyna kelgen jedel-tergeý toby ıir oıyqty qarýǵa arnalǵan 11 patron salynǵan paketti tárkiledi. Saraptama kórsetkendeı, bul oq-dári 5,56h45 ı 7,62h39 kalıbrli atýǵa jaramdy patrondar bolyp shyqty. Mundaı oq-dári «Saıga», «Vepr» jáne basqa da ańshylyq karabınderine jaramdy.
Atalǵan fakti QR Qylmystyq kodeksiniń 287-babynyń 3-bóligi boıynsha Sotqa deıingi tergep-tekserýlerdiń biryńǵaı tiziliminde tirkeldi. Qazir polıtseıler patrondardyń ıesin anyqtap jatyr.
«Kóktemgi ańshylyq maýsymy kezinde qarý-jaraq pen oq-dárini zańsyz satyp alý jáne saqtaý úshin jaýapkershilik kózdelgenin taǵy bir márte eske salamyz. QR QK 278-babynyń 3-bóliginiń sanktsııasyna sáıkes atys qarýyn (tegis uńǵyly ańshylyq qarýdan basqa) jáne oq-dárilerdi zańsyz saqtaý – 5 myń AEK deıingi mólsherde aıyppul salýdan, 5 jylǵa deıingi merzimge bas bostandyǵynan aıyrýǵa deıin ákep soǵady. Sondaı-aq tirkelgen qarýdyń qylmystyq ortaǵa túsý qaýpin azaıtý úshin ony qaýipsiz saqtaý sharalaryn qatań ustaný qajet ekenin eske salamyz», - deıdi Petropavl qalalyq polıtsııa basqarmasy birinshi polıtsııa bóliminiń bastyǵy Tilegen Áljanov.
