Petropavl turǵyny kólge batyp aram ólgen maldy soıyp, bazarǵa ótkizgen
PETROPAVL. QazAqparat – Soltústik Qazaqstan oblysynda «Mal urlyǵy» jedel-profılaktıkalyq is-sharasy ótip jatyr. Operatsııa bastalǵaly 13 quqyq buzýshylyq anyqtaldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, «Mal urlyǵy» jedel-aldyn alý is-sharasy óńirde 15 qarasha bastaldy. Operatsııa aıasynda óńir polıtseıleri veterınarlyq qyzmettiń ınspektorlarymen birge et satatyn bazarlardy tekserip jatyr. Maqsaty – mal urlyǵyn ashý, urlanǵan mal etiniń saýdaǵa shyǵýyna jol bermeý. Іs-sharanyń alǵashqy kúninde 33 saýda orny, mal jáne et ónimderin tasymaldaǵan 73 avtokólik tekserildi. Mamandar oblys aýdandarynda 100-ge tarta fermerlik sharýashylyq pen mal qamaý oryndaryn aralap shyqty. Nátıjesinde veterınarııa salasynda 13 quqyq buzýshylyq tirkeldi.
Petropavldaǵy bazarlardyń birinen qoldanýǵa jaramsyz et ónimi anyqtaldy. Qala turǵyny M.Jumabaev aýdanynan tıisti qujattarsyz úsh jylqynyń etin ákelgen. Tekserý barysynda maldyń aram ólgeni belgili boldy. Olar kólde sýǵa batyp ketken. Et tárkilenip, joıylýǵa jiberildi. Er adam QR Ákimshilik quqyq buzýshylyq týraly Kodeksiniń 406-baby «Qazaqstan Respýblıkasynyń veterınarııa salasyndaǵy zańnamasyn buzý» boıynsha jaýapkershilikke tartyldy.
«Sondaı-aq mal baǵý erejelerin buzýdyń 31 deregi anyqtaldy. buzýshylyǵy anyqtaldy. Kúz jáne qysta keı aýyl turǵyndary jylqylaryn tebinde baqtashysyz ustaıdy. Erkin jaıylymda júrgen mal jolǵa shyǵyp ketip, kólik júrgizýshilerine qaýip tóndirýi múmkin. Sondaı-aq baqtashysy joq túlik urylarǵa ońaı olja. Oblys turǵyndarynan zańnamany qatań ustanyp, maldaryn erkin jaıylymǵa jibermeýlerin suraımyz», - deıdi SQO PD krımınaldyq polıtsııa basqarmasynyń bastyǵy Marat Jumalıev.
Jedel-profılaktıkalyq is-shara aıasynda buryn jasalǵan eki mal urlyǵy ashyldy. Oblysta jyl basynan 31 mal urlyǵy tirkeldi. Olardyń búginde 26-sy ashyldy. Barlyǵy 185 bas mal urlandy, 175-i tabylyp, ıelerine qaıtaryldy.
