Petropavl turǵyny ınternet-alaıaqtarǵa aldanyp, 1 mln teńgesinen aıyryldy

PETROPAVL. QazAqparat – Petropavl turǵyny ınternet-alaıaqtardyń sózine senip, 1 mln teńgesin olardyń esepshotyna aýdarǵan, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, petropavldyq áıelge telefon arqyly bireý habarlasyp, onyń depozıttik esepshotynan bireýdiń aqsha urlaıyn dep jatqanyn aıtqan. Bank qyzmetkerimin dep tanystyrǵan adamǵa sengen áıel onyń aıtqanyn buljytpaı istegen. Beıtanys er adam basqa esepshot ashyp, aqshany 250 myń teńgeden aýdarýdy suraǵan. Osylaısha alaıaqtar áıeldiń 1 mln teńgesin oljalaǵan.

Tergeýshilerdiń aıtýynsha, bul – ınternet-alaıaqtyqtyń keń taraǵan túri. Keń kólemde túsindirme jumystarynyń júrgizilýine qaramastan turǵyndar alaıaqtarǵa aldanady.

«Alaıaqtar ózderin asa senimdi ustaıdy. Arnaıy termınderdi qoldanyp, sonymen abonentterdiń senimine kiredi. Internet-alaıaqtardan qorǵanýdyń eń senimdi joly esepshottaǵy aqshaǵa qatysty barlyq is-áreketti tek bankterde atqarý qajet. Kóp jaǵdaıda alaıaqtar ózderin banktiń qaýipsizdik qyzmetinenbiz dep tanystyrady. Olar esepshottaǵa aqshany bireýlerdiń urlamaqshy bolǵanyn aıtady. Mundaıda abyrjýdyń qajeti joq. Bankke qońyraý shalyp, aqshanyń ornynda jatqanyna kóz jetkizýge bolady», - deıdi Petropavl qalalyq polıtsııa basqarmasynyń bastyǵy Jandos Muqatov.

Jyl basynan qalanyń 16 turǵyny ınternet-alaıaqtardan zardap shekti. Olardyń altaýy «Instagram» áleýmettik jelisi arqyly taýar satyp almaq bolypty.