Petropavl turǵyny garajynan XIX ǵasyrdyń myltyǵyn taýyp aldy

Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavl qalasynyń polıtsııa basqarmasyna 58 jastaǵy qala turǵyny habarlasqan. Ol tártip saqshylaryna paıdalanylmaıtyn garajyn qoqystan tazartyp júrip qos uńǵyly myltyq salynǵan qapshyq taýyp alǵanyn aıtty. Er adam tisqaqqan ańshy, qarý-jaraq ustaýǵa ruqsaty bar bolǵandyqtan zańsyz saqtalǵan qarý úshin jaýapkershiliktiń barlyǵyn jaqsy biledi. Sondyqtan tabylǵan qarý týraly birden polıtsııaǵa habarlaǵan. Er adam qarýdy erikti túrde tapsyrdy. Tabylǵan myltyq zertteýge jiberildi.

SQO PD Jedel-krımınalıstıkalyq basqarmasynyń qyzmetkerleri onyń oq atýǵa jaramdy atys qarýy ekenin rastady. Bir qyzyǵy, bul myltyq belgııalyq «Bayard» fırmasynyń sırek kezdesetin ańshy qarýy bolyp shyqty. Myltyqqa oıylyp jazylǵan belgilerinen krımınalıster onyń 1893-1898 jyldar aralyǵynda shyǵarylǵan degen boljamǵa keldi. Endi sırek kezdesetin qarý oblystyq polıtsııa departamentiniń mýzeıine tapsyrylmaq. «Turǵyndar tirkelmegen qarýdy erikti túrde tapsyrǵan jaǵdaıda ǵana qylmystyq jáne ákimshilik jaýapkershilikten bosatylady. Ótken jyly oblys aýmaǵynda zańsyz aınalymnan 128 tirkelmegen atys qarýy alyndy, onyń 17-i Petropavlda bolǵan», - deıdi SQO PD Ákimshilik polıtsııa basqarmasynyń bastyǵy Serik Áljanov.

Foto: Soltústik Qazaqstan oblysy polıtsııa departamenti