Petropavl turǵyny eki adamdy baltamen jaraqattady
PETROPAVL. QazAqparat – Petropavlda otyrystyń sońy janjalǵa ulasyp, er adam eki bótelkelesin baltamen jaraqattady, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, 8 aqpanǵa qaraǵan túni polıtsııaǵa er adam habarlasyp, óziniń qylmys jasaǵandyǵyn aıtqan.
Petropavl turǵyny jeke sektordaǵy úılerdiń birinde bólme jaldap turady. Aıtýynsha, ózine asa tanys emes eki er adamdy qonaqqa shaqyrǵan, sońynda daý-janjal týyndap, bireýine balta siltegen. Ekinshi qonaǵy tóbeleskenderdi aıyrý ústinde zardap shekken. Saldarynan bireýi aýyr jaraqat alyp aýrýhanaǵa tústi, ekinshisi medıtsınalyq kómek kórsetilgen soń úıine jiberildi.
Atalǵan fakti «Qasaqana densaýlyqqa aýyr zııan keltirý» baby boıynsha Sotqa-deıingi tergep-tekserýdiń biryńǵaı tizilimine engizildi. Kúdikti ustaldy, onyń jasy 41-de, buryn sottalǵan. Qazir oǵan qatysty qamaýǵa alý túrindegi bultartpaý sharasyn tańdaý máselesi sheshilip jatyr.
«Spırttik ishimdik ishýdiń sońy kóp jaǵdaıda osylaı aıaqtalady. Tártip saqshylarynyń mindeti osyndaı qylmys túrleriniń aldyn alý. Bul birinshi kezekte, eseptegi tulǵalardy qadaǵalaıtyn, alkogolge qarsy zańnamany saqtaý boıynsha tekseristerdi júzege asyratyn ýchaskelik polıtsııa ınspektorlarynyń jumysy. Ótken jyldyń birinshi aıynda osyndaı 12 fakti anyqtalsa, bıylǵy jyly 8 derek tirkelip, úsheýi óndirispen aıaqtaldy», - deıdi SQO PD krımınaldyq polıtsııa basqarmasynyń bastyǵy Petr Klımov.
