Petropavl turǵyny dúkenshiniń mas kúıin paıdalanyp, kassadan aqsha urlamaq boldy
ASTANA. 8 qazan. QazAqparat - «Petropavl qalasynyń Qopa aýdanynda ornalasqan «Ýdacha» dúkeninde urlyq jasaldy. Kassadan 200 myń teńge qoldy boldy.
Urlyqty kim jasaǵanyn satýshy esine túsire almady, óıtkeni satýshy áıel ol sátte mas bolǵan»,-dep habarlaıdy Soltústik Qazaqstan oblystyq Іshki ister departamentiniń baspasóz qyzmeti.
Baspasóz málimetterine qaraǵanda, urlyqty tańerteń kelgen dúken ıesi anyqtady. Al satýshy bul oqıǵa jaıly esh nárse túsindire almady. Oqıǵa ornyna Petropavl qalalyq Іshki ister basqarmasy 2-shi polıtsııa bóliminiń jedel tergeý toby shaqyrtyldy. Urlyqtyń qalaı jasalǵandyǵy saýda ornynda ornalasqan beıne baqylaý qurylǵysy arqyly belgili boldy. Jedel ýákilder beınetúsirilim arqyly dúkenge bir jigittiń kirip, kassadan aqsha alǵanyn kórdi. Polıtsııa qyzmetkerleri bul jigitti birden tanydy. Ol buryn urlyq jasaǵany úshin berneshe ret sottalǵan Petropavl qalasynyń turǵyny bolyp shyqty. 34 jasar ury birneshe saǵattan keıin qolǵa tústi. Alǵashynda ol, urlyq jasaǵandyǵyn moıyndamaýǵa tyrysyp baqty. Biraq beınekórinisti óz kózimen kórgen soń ury óz kinásin moıyndaýǵa májbúr boldy. Ustalǵan azamattyń aıtýynsha, sol kúni dúkenge kirgen ol satýshynyń mas ekenin baıqaǵan. Keıin dúkenge qaıta oralyp, satýshymen birlesip araq ishken. Al satýshy áıel uıyqtap qalǵanda, kassadaǵy aqshany oljalaǵan. Seziktiden 5 myń teńge ǵana tárkilendi, qalǵan aqshany ol túnde dámhanalarda kóńil kóterý úshin jumsap jibergen. Atalǵan fakti boıynsha qylmystyq is qozǵaldy. Jýyrda ǵana basqa urlyq úshin jaýapqa tartylyp, sotta jábirlenýshimen tatýlasqan seziktiniń ústinen taǵy da qylmystyq is qozǵalyp, tergeý júrgizilýde.
