Petropavl turǵyny dosyn serýendetý úshin bireýdiń kóligin urlaǵan
PETROPAVL. QazAqparat – Petropavlda qala turǵynynyń aýladaǵy kóligin minip ketkender keıin ony qala syrtynda jaǵyp jibergen, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzetiniń málimetinshe, 30 qazan kúni Petropavl qalasynyń 41 jastaǵy turǵyny Ýálıhanov kóshesindegi aýlalardyń birine qoıyp ketken kóligin ornynan tappaǵan. «VAZ-21070» avtokóliginiń joǵalǵandyǵy jóninde birden polıtseılerge habarlapty.
Joǵalǵan mashınany polıtseıler tek ekinshi kúni ǵana tapty. Janǵan mashınany urylar Asanovo eldi mekeniniń mańynda, jol jıegine tastap ketipti.
Jedel tergeý jumystary barysynda kúdikti anyqtaldy. Ol – Petropavl qalasynyń 1999 jyly týǵan turǵyny bolyp shyqty.
Aıtýynsha, sol kúni ol mas bolǵan. Bireýdiń kóligin dosy - 1996 jyly týǵan oblys ortalyǵynyń turǵynyn serýendetý úshin minip ketken. Jolda kólikten ózdiginen órt shyqqan.
«Bul derek Sotqa deıingi tergep-tekserýdiń biryńǵaı tizilimine «Urlyq» baby boıynsha kirdi. Zaqym kelgen kólik tárkilendi. Kúdiktilerge qatysty kelýge mindetteý túrindegi bultartpaý sharasy qoldanyldy. Tergeý ázirge aıaqtalǵan joq, istiń mán-jaıy anyqtalyp jatyr», - deıdi Petropavl qalalyq PB Birinshi polıtsııa bóliminiń bastyǵy Tilegen Áljanov.
