Petropavl turǵyny áıelder zorlyǵyna qatysty mýzykalyq klıp túsirdi
PETROPAVL. QazAqparat – Petropavl qalasynyń turǵyny áıelderge qatysty jasalatyn zorlyq-zombylyqqa qarsylyǵyn bildirip, mýzykalyq klıpti jaryqqa shyǵardy, dep habarlaıdy QazAqparat tilshisi.
Petropavl turǵyny Ksenııa Shemberger týyndynyń avtory jáne oryndaýshysy. «THE DOLL», ıaǵnı «qýyrshaq» dep atalatyn mýzykalyq klıpti kórermen nazaryna usyný úshin ol jeti jylyn jumsaǵan eken. Onyń oıyn júzege asyrýǵa N.Pogodın atyndaǵy orys drama teatrynyń akterleri qoldaý kórsetipti. Búginde daıyn ónim áleýmettik jelide jurtshylyq nazaryna usynyldy.
«Klıptiń negizgi ıdeıasy - áıelderge qatysty zorlyq-zombylyqqa qarsylyq bildirý. Men ómirde óz basymnan ótkerdim, sondyqtan onyń qanshalyqty qorqynyshty ekenin bilemin. Mundaı jaǵdaı basynan ótken adamǵa ony umytý óte qıyn. Áıelder zorlyqqa shydamaı, jarııa etýi kerek. Ózderine kómektespese, kómek suramasa - arty qaıǵyly aıaqtalýy múmkin», - deıdi Ksenııa Shemberger.
Ksenııa Petropavldaǵy kolledjderdiń birinde mýzykalyq jetekshi bolyp eńbek etedi. Áleýmettik jobasy arqyly avtor qyz-kelinshekterge oı salýdy maqsat etken. Óıtkeni kópshilik jurtqa jarııa etýdi uıat sanap, ishteı tynady. «THE DOLL» atty mýzykalyq klıpi arqyly adamdardyń bul máselege degen kózqarasyn ózgertpek.
