Petropavl turǵyny 10 gramm geroın úshin 10 jylǵa sottalýy múmkin
ASTANA. QazAqparat - Petropavl qalasynyń 34 jastaǵy turǵyny polıetılendi paketpen esirtkilik zat ótkizbek bolǵan jerinen quqyq qorǵaýshylardyń qolyna tústi, dep habarlaıdy «QazAqparat» HAA tilshisi.
Qalalyq narkobızneske qarsy kúres bóliminiń qyzmetkerleri oblystyq apparattaǵy áriptesterimen birge jedel izdestirý sharalaryn júrgizgen. Operatsııa barysynda 34 jastaǵy jigit ustaldy. Arnaıy qyzmetkerler onyń jalǵa alǵan úıin teksere kele 4 túıinshekke oralǵan kúdikti zatty taýyp alǵan. Saraptama qorytyndysy boıynsha tabylǵan zat 10 gramm mólsherindegi geroın bolyp shyqty.
Tárkilengen geroın asa iri mólsherdegi esirtkilik zat bolyp sanalady. Arnaıy qyzmekterlerdiń aıtýynsha, geroınniń osy mólsheri mekteptegi eki synypty «ınege otyrǵyzýǵa» jeterlik.
Ustalǵan azamat ýaqytsha ustaý oqshaýlaǵyshyna qamaldy. QR QK 297-baby boıynsha sot aldy tergeý amaldary júrgizilip jatyr. Aıyptalýshynyń kinási dáleldense, ol 10 jyldan 15 jylǵa deıin bas bostandyǵynan aıyrylýy múmkin.
SQO ІІD baspasóz qyzmetiniń habarlaýynsha, jyl basynan beri ár túrli deńgeıdegi 200 kelige jýyq esirtkilik zat tárkilengen. Onyń ishinde 190 gramnan astamy geroın bolyp otyr.
