Petropavl turǵyndarynyń qoqys úshin qaryzy 28 mln teńgeden asty
PETROPAVL. QazAqparat – Petropavl turǵyndarynyń qoqys úshin bereshegi 28 mln teńgeden asty. Tek «Bereke» shaǵyn aýdanynda ǵana qaryz 4,5 mln teńgege jetken, dep habarlaıdy QazAqparat tilshisi.
Petropavl turǵyndary qoqys úshin aqsha tóleýge asyǵar emes. Al jeke sektor turǵyndary, tipti turmystyq qaldyq shyǵaratyn kompanııalarmen kelisimge de otyrmaıdy. Saldarynan shahar kóshelerinde taý bolyp úıilgen qoqys oryndary paıda bolǵan.
«Munyń barlyǵy – jeke sektordyń qoqysy. Olar bizben kelisimge otyrǵylary kelmeıdi. Bul aýdanda uıym kóp qabatty úılermen ǵana jumys isteıdi. Jaǵdaı ózgermeıdi, óıtkeni, qoqysty jınap shyǵarǵanmen, ol qaıta paıda bolady, turǵyndarǵa turmystyq qaldyqtardy tógý kerek qoı. Ár úı bizben kelisimge otyrmaıynsha másele ózekti bolyp qala bermek. Alaıda turǵyndar qaltalarynan aqsha shyǵarǵylary kelmeıdi. Eki jyl qalaǵa kómektestik, mundaı qoqysty tegin shyǵardyq. Qazir ondaı múmkindigimiz joq», - deıdi qatty turmystyq qaldyqtardy shyǵaratyn kompanııa dırektory Murat Esmuqanov.
Qazirgi ýaqytta Petropavlda qoqys úshin tarıf bir adamǵa 220-230 teńge aralyǵynda.
«Ár úıge bardyq, keıbiri tipti esigin de ashpaıdy. Bul aýdanda konteınerler qoıǵan kezde turǵyndardyń 30 % ǵana kelisimge otyrǵan edi. Biraq jeke sektorda turatyndar turmystyq qatty qaldyqtyń ne ekenin bilmeıdi. Olar bizdiń konteınerlerimizdi maldyń qıymen toltyratyn kezderi boldy. Saldarynan ol ıistenip, kórshi mańdaǵy úıler ol ydystardy alyp tastaýymyzdy surady. Sol sebepti, turǵyndardyń ótinishi boıynsha olardy alyp kettik. Bul jaǵdaıdy Petropavldaǵy búkil jeke sektordan kórýge bolady», - deıdi Murat Esmuqanov.
Belgilenbegen orynǵa qoqys tastaýshylarmen kúresý úshin olarǵa aıyppul da salynǵan. Biraq munyń da nátıjesi shamaly.
«Bul quqyq buzýshylyqqa ákimshilik jaýapkershilik qarastyrylǵan. Aıyppul 5 AEK mólsherinde, ıaǵnı 15 300 teńge shamasynda.
Buryn bul jerde qoqys jáshikteri bolǵan, shamamen bir aı buryn alyndy. Sol mezetten bastap turǵyndarǵa 22 hattama toltyryldy, jalpy somasy - 130 myń teńge. Bul jerge eshkim syrttan kelip, qoqys tastamaıdy, zańdy buzatyn – jergilikti turǵyndar», - deıdi «Bereke» shaǵyn aýdanynyń ýchaskelik polıtsııa ınspektory Beıbit Álimjanov.
Qazir Petropavlda qatty turmystyq qaldyqtardy shyǵarýmen 4 kompanııa aınalysady.
«Búginde Petropavlda qoqys úshin turǵyndar 28 mln teńge bereshek, tek «Bereke» shaǵyn aýdany boıynsha ǵana 4,5 mln teńge qaryz bar. Bul – kompanııamen kelisimge otyrǵandardyń bereshegi. Al qalǵandary kelisimge otyrmaıdy, saldarynan kóshe boılarynda osyndaı qoqys úıindileri paıda bolǵan.
Petropavlda qoqys úshin tarıf 2017 jyldan beri ósken joq. Qazirgi ýaqytta janar-jaǵarmaı da, qosalqy bólshekter de – bári qymbattap jatyr, degenmen kompanııalar óz jumystaryn toqtaýsyz atqaryp keledi. Biraq halyq muny túsingisi kelmeıdi», - deıdi Petropavl qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń baspasóz hatshysy Ásem Aıtýlova.
