Petropavl turǵyndary velosıpediniń málimetin polıtsııa bazasyna engizdi
PETROPAVL. QazAqparat – Petropavlda velosıped urlyǵymen kúresý úshin turǵyndar kólikteriniń málimetterin polıtseılerdiń arnaıy bazasyna engizip jatyr, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, jaz shyǵa velosıped – urylardyń nysanasyna jıi iligedi. Urlyqtyń aldyn alý úshin qalalyq polıtsııa basqarmasynyń qyzmetkerleri byltyr velosıpedterdiń biryńǵaı bazasyn qurdy. Munda kez-kelgen adam óziniń eki dóńgelekti kóligin tirkeı alady.
Polıtseılerdiń aıtýynsha, osy bazaǵa tirkelgen velosıpedterdiń ishinde qoldy bolyp, tabylǵandary da bar. Urylar kóp jaǵdaıda, qaraýsyz qalǵanyn, úı men dúkenderdiń mańynan nemese podezderdiń kireberisinen alyp ketedi eken. Ýaqytyly júgingen jaǵdaıda, urlyqtyń izin sýytpaı ashýǵa bolady.
«Petropavl turǵyndaryna Polıtsııa basqarmasynda velosıpedterdiń derekter bazasy jumys isteıtindigin eske salamyz. Velosıped ıeleri eki dońǵalaqty kólikteriniń serııalyq nómirin, túsin, modeli men erekshe belgilerin kórsete otyra, málimetterdi bazaǵa engize alady. Ár adam óz erkimen júginedi, saýalnamany kez-kelgen ýchaskelik polıtsııa pýnktinde toltyrýǵa bolady. Velosıped urlanǵan jaǵdaıda usynylǵan málimetter urlanǵandy jyldam anyqtaýǵa kómektesedi. Búgingi tańda bazada 939 velosıped týraly málimet bar», - deıdi Petropavl qalalyq polıtsııa basqarmasynyń bastyǵy Jandos Muqatov.
Jalpy velosıped urlyǵyna tosqaýyl qoıý úshin mindetti túrde aıdap áketýge qarsy senimdi qurylǵylardy paıdalanǵan jón. Qalyń arqansymǵa bekitilgen velosıped qylmyskerlerdi qyzyqtyrmaýy múmkin, sebebi adam kóp júretin jerde velosıpedti jyldam bosatyp alý ońaıǵa soqpaıdy. Sondaı-aq múmkindiginshe velosıpedti beınebaqylaý kameralary bar jerge qaldyrǵan jón.
