Petropavl turǵyndary Túrkııaǵa gýmanıtarlyq kómek jóneltpek

PETROPAVL. QazAqparat – Petropavl turǵyndary zilzaladan zardap shekken túrkııalyqtarǵa jylý jınap jatyr. Al jergilikti tigin fabrıkasy 2 mln teńgeniń kıim-keshegin jóneltpek, dep habarlaıdy QazAqparat tilshisi.

Soltústik Qazaqstan oblysynyń «Birgemiz» volonterler front-keńsesi Petropavl turǵyndary ákelgen zattardy Dostyq úıinde qabyldap jatyr.

Negizinen jyly kıimder, aıaq-kıim, tósek-oryn, kúndelikti turmysqa qajet zattar, jeke bas gıgıenasyna arnalǵan buıymdar qabyldanyp jatyr.

Uıymdastyrýshylardyń aıtýynsha, búginge deıin 400 kg zat jınaldy. Búgin ǵana Petropavldaǵy kolledjderdiń biri 4 qap kıim-keshek ákelgen.

Turǵyndar da qoldan kelgenshe kómektesip jatyr, biri kir jýatyn untaq, endi biri – jórgekter ákelgen.

«Jeksenbiniń keshine deıin qabyldaımyz. Odan keıin ákelingen zattardy suryptap, býyp-túıip, dúısenbi kúni jiberemiz. Ákelinip jatqan zattardyń bári derlik jańa, keıbiri qoldanysta bolsa da sapasy óte jaqsy», - deıdi volonterler.

Túrkııadaǵy zilzaladan zardap shekkenderge Petropavldaǵy «Progress» tigin fabrıkasy» JShS-de gýmanıtarlyq kómek jibermek.

Jalpy quny 2 mln teńgege baǵalanǵan kıim-keshek búgin Túrkııa elshiligine jóneltiledi.

«Túrkııa Respýblıkasymen biz uzaq ýaqyttan beri dostyq qarym-qatynastamyz. Ondaǵy qazirgi jaǵdaı qatty júregimizge batty. Sondyqtan biz de qol qýsyryp otyra almadyq. Búgin balalar men eresekterge jyly syrt kıimderin jáne úıindilerde jumys istep jatqan eriktiler men qutqarýshylarǵa arnalǵan arnaıy kıimderdi jiberemiz. Osy zilzaladan zardap shekkenderdiń jaqyndary men týystaryna qaıǵyra kóńil aıtamyz», - dedi tigin fabrıkasynyń menedjeri Dınara Tólegenova.

Foto: tigin fabrıkasy