Petropavl turǵyndary páterlerinde jylýdyń kúrt azaıǵandyǵyn aıtyp shaǵymdanýda
PETROPAVL. QazAqparat – Petropavlda turǵyndar páterleriniń kúrt sýyǵanyn aıtyp, áleýmettik jelide jarysa jarııalady. Qalalyqtar túnde batareıalarynan shýyldyń estilgenin aıtýda, dep habarlaıdy QazAqparat tilshisi.
Petropavl turǵyndarynyń aıtýynsha, páterlerdegi qol tıgizbeı turǵan batareıler túngi saǵat ekilerden keıin sýı bastaǵan. Sondaı-aq jylytý quralynan túsiniksiz shý estilgen. Qazir qalanyń keı aýdandaryndaǵy baspanalarda qońyr salqyn temperatýra saqtalǵan.
SQO prokýratýrasy jaǵdaıdy túsindirdi.
«16 jeltoqsan kúni Petropavl turǵyndary páterlerindegi batareıden shýyl estildi. Oǵan saǵat 2.30 shamasynda 2-jylý-elektr ortalyǵyndaǵy týrbına tsehynda 3 jelilik sorǵynyń tehnıkalyq sóndirilýi sebep. Stantsııanyń personaly negizgi qondyrǵyda tıisti aýystyrýlar jasady. Saǵat 4.40 mınýt ketkende gıdravlıkalyq rejım qalpyna keltirildi. Sýdyń aınalymy toqtatylǵan joq», - delingen habarlamada.
Qazirgi ýaqytta jylý tasymaldaýshyda 78 gradýsty kórsetip tur, al norma 83 gradýs. Jylý birtindep kóterilip jatyr.
«Qurmetti qala turǵyndary! Sizderden jalǵan aqparatty taratpaýǵa jáne tek qana resmı aqparat kózderine senýge shaqyramyz», - dedi prokýratýra ókilderi.
