Petropavl turǵynyna TikTok-ta jalǵan aqparat taratqany úshin aıyppul salyndy
PETROPAVL. KAZINFORM — Ol Petropavlda bolǵan jol-kólik oqıǵasy týraly jalǵan aqparatty TikTok áleýmettik jelisinde jarııalaǵan.
Petropavl qalasynyń ákimshilik quqyq buzýshylyqtar jónindegi mamandandyrylǵan sotynyń málimetinshe, bıyl tamyz aıynda M. óz paraqshasynda júrgizýshi velosıpedshini qaǵyp ketkeni, onyń aýyr jaraqat alyp, jedel medıtsınalyq járdem kóliginde jatqany jáne ózdiginen júrip-tura almaıtyny týraly aqparat ornalastyrǵan. Osy arqyly Ch.-nyń quqyqtary men zańdy múddeleriniń buzylýyna jaǵdaı jasaǵan.
Alaıda sot barysynda bul málimetterdiń shyndyqqa sáıkes kelmeıtini anyqtaldy. Velosıpedshige oqıǵa ornynda medıtsınalyq kómek kórsetilgenimen, ony aýrýhanaǵa jatqyzý qajet bolmaǵan. Sonymen qatar, velosıpedshiniń ózine jol júrisi qaǵıdalaryn buzǵany úshin ákimshilik quqyq buzýshylyq týraly hattama toltyrylǵan.
Jalǵan aqparattyń taralǵany ákimshilik quqyq buzýshylyq týraly hattamamen, oqıǵaǵa qatysýshynyń ótinishi men túsiniktemelerimen jáne beınejazbamen dáleldengen.
Sotta M. óz kinásin moıyndap, usynylǵan dáleldemelerge qarsylyq bildirmegen.
Sot qaýlysymen M. kináli dep tanylyp, oǵan 20 AEK mólsherinde, ıaǵnı 86 500 teńge aıyppul taǵaıyndaldy.
Sot qaýlysy ázirge zańdy kúshine engen joq.
Osyǵan deıin Aqtóbe oblysynda TikTok-ta balaǵat sóz aıtqan turǵyn qamaýǵa alynǵanyn jazǵan edik.
