Petropavl turǵyny zergerlik sheberhanany tonap, artynan órt qoıǵan
PETROPAVL. KAZINFORM – Petropavldaǵy «Galaktıka» saýda úıine órt qoıǵan kúdikti ustaldy.
4 jeltoqsan kúni tańǵy saǵat 5.00 shamasynda úsh qabatty turǵyn úıge japsarlas salynǵan bir qabatty saýda úıinde órt shyqty. Órt sóndirýshiler jyldam áreket etip, jalynnyń jaıylýyna jol bermedi.
Soltústik Qazaqstan oblystyq polıtsııa departamenti baspasóz qyzmetiniń málimetinshe, alǵashqy boljamda elektr symdarynyń qysqa tuıyqtalýy qarastyryldy, biraq zergerlik sheberhanaǵa kóp zııan kelýi mamandardyń kúdigin týdyrdy.
Tártip saqshylary saýda úıiniń mańyndaǵy beınebaqylaý kameralarynyń jazbalaryn tekserdi. Nátıjesinde oqıǵadan biraz ýaqyt buryn sol mańda bolǵan jáne «Galaktıkaǵa» qarsy ornalasqan bos saýda pavılonyna birdeńe jasyryp ketken kúdiktini anyqtady. Pavılondy tekserý barysynda polıtseıler onyń ishinen quny 1 mln teńgeden asatyn zergerlik buıymdar salynǵan túıinshekti tapty. Keıin tolyq tekserý saýda úıine qasaqana órt qoıý áreketin rastady.
- Beınejazbalar arqyly kýágerlerdi de anyqtaý múmkin boldy. Tergeý nusqasy boıynsha, kúdikti órt qoıǵannan keıin urlanǵan baǵaly zattardy birden alyp ketýge olardan batpaǵan. Jedel-izdestirý is-sharalary nátıjesinde urlyq jáne bótenniń múlkin qasaqana joıý boıynsha kúdikke ilingen, buryn sottalǵan 32 jastaǵy petropavldyq ustalyp, qamaýǵa alyndy. Tergeý amaldary júrgizilip jatyr, - deıdi tártip saqshylary.
Polıtseılerdiń aıtýynsha, jyl basynan beri oblysta beınekameralardyń kómegimen 800-ge jýyq qylmys ashyldy, onyń 208-i – urlyqqa qatysty.
Buǵan deıin Astanada dámhanadan shyqqan órt tolyq sóndirilgenin jazǵan edik.