Petropavl turǵyny sot arqyly turǵyn úı baǵdarlamasyna qatysýǵa qol jetkizdi

ASTANA. KAZINFORM – Petropavl qalasynyń turǵyny, kámeletke tolmaǵan úsh balany tárbıeleýshi jalǵyzbasty ana 2007 jyldan beri «memlekettik qyzmetker» sanaty boıynsha baspanaǵa muqtaj retinde esepte turǵan.

Joǵarǵy sot málimetinshe, ata-anasy qaıtys bolǵannan keıin oǵan Olshanka aýylyndaǵy aýdany 20,2 sharshy metr (onyń ishinde 10,5 sharshy metr turǵyn úı alańy) turǵyn úıdiń ¼ bóligi muraǵa qalǵan.

2023 jyly talap qoıýshy syıǵa tartý sharty boıynsha úıdegi óz úlesin kórshisine ótkizgen.

Bir jyldan keıin jergilikti atqarýshy organdardyń kezekte turǵan adamdardy nesıelendirý baǵdarlamasy boıynsha oǵan Petropavl qalasynan páter bólingen.

Alaıda turǵyn úı-kommýnaldyq sharýashylyq bólimi buryn ıelikten shyǵarylǵan turǵyn úı turýǵa jaramdy degendi alǵa tartyp, áıelmen satyp alý-satý shartyn jasasýdan bas tartqan («Turǵyn úı qatynastary týraly» Zańnyń 72-baby 2-tarmaǵy).

Sotqa aryz bergen kezde áıel turǵyn úı-kommýnaldyq sharýashylyq bóliminen onymen satyp alý-satý shartyn jasaýdy mindetteýdi talap etken.

Sot is materıaldaryn zerdeleı kele, 10,5 sharshy metr aýmaqty quraıtyn muragerlik turǵyn úıdiń sanıtarlyq-tehnıkalyq talaptarǵa saı kelmeıtinin anyqtady.

Úlestiń jalpy aýdany 20,2 sharshy metr bolsa, «Turǵyn úı qatynastary týraly» Zańnyń 75-babynyń 1-tarmaǵyna sáıkes turǵyn úı alańynyń belgilengen normasy bir adamǵa keminde 15 sharshy metr.

Sonymen qatar turǵyn úı-kommýnaldyq sharýashylyq bólimi otbasynda ártúrli jynystaǵy balalardyń bolýyn esepke almaǵan. Bul olardyń jeke turýy úshin qoldanystaǵy normalarǵa sáıkes jaǵdaı jasaýdy talap etedi.

Sot talap qoıýshynyń talaptaryn qanaǵattandyryp, turǵyn úı-kommýnaldyq sharýashylyq bólimin turǵyn úı baǵdarlamasyna qatysýshymen satyp alý-satý shartyn jasasýdy mindettedi.

Sheshim zańdy kúshine endi.

Buǵan deıin Qyzylordada jetim jáne ata-anasynyń qamqorlyǵynsyz qalǵan 15 bala úı kezegine qoıylmaǵany týraly jazǵan edik.