Petropavl turǵyny sot arqyly alaıaqtyq jolmen aırylǵan 1 mln teńgesin qaıtaryp aldy

PETROPAVL. KAZINFORM – Petropavl turǵynyna belgisiz bireý mobıldik qosymsha arqyly alaıaqtyq jolmen 2 mln teńge nesıe rásimdegen. Sottyń sheshimimen zardap shegýshi somanyń jartysyn qaıtaryp aldy.

Petropavl qalasynyń №2 sotyna oblys ortalyǵynyń turǵyny aqshasyn óńdirip alý týraly talap aryzben júgindi.

Aryzdanǵan áıeldiń aıtýynsha, 2003 jyldyń qańtar aıynda oǵan belgisiz bireý habarlasyp, ózin «Qazaqstan Ulttyq banki» AQ qyzmetkeri retinde tanystyryp, mobıldik qosymsha arqyly alaıaqtyq jolmen 2 mln teńge nesıeni rásimdegen.

Osy fakt boıynsha sotqa deıingi tergeý júrgizildi. 

Qylmystyq isti tergeý barysynda nesıege alynǵan qarajattyń bir bóligi – 1 mln teńge sol kúni jaýap berýshige tıesili shotqa aýdarylǵany anyqtaldy.

Azamattyq kodekstiń 953 babyna sáıkes negizsiz ıemdengen múlikti ıesine qaıtarýǵa mindetti. 

Tergeý barysynda talap berýshiniń shotynan jaýapkerdiń shotyna aqshalaı qarajat aýdarylǵany anyqtaldy, bul jáne jaýapkerdiń aqshany alǵanyn bank rastady. 

Osyny eskere otyryp, sot talap aryzdy tolyǵymen qanaǵattandyrdy. Jaýapker talap berýshige 1 mln teńgeni qaıtaryp berýi tıis.

Sottyń sheshimi zańdy kúshine engen joq.

Buǵan deıin SQO-da qutqarý qyzmetiniń kóligi apatqa túsip, 1 adam mert bolǵanyn jazǵan edik.