Petropavl turǵyny polımerli balshyqtan erekshe qýyrshaqtar jasaıdy
PETROPAVL. KAZINFORM - Petropavl turǵyny Evgenııa Krýtevıch balalyq armanyn iske asyryp, qýyrshaq sheberhanasyn ashty.
Buǵan deıin jumsaq jıhaz jasaıtyn tsehta sheber, jańa dızaındardy oılap tabýshy bolyp jumys istegen kelinshek bıyl jańa jylda jańa kásipti qolǵa alady.
- Qýyrshaqqa jastaıymnan áýespin. Óskende qýyrshaq fabrıkasynda jumys isteımin dep armandaıtynmyn. Úıde qýyrshaqtarym óte kóp boldy, men olarǵa kıim-keshekti ózim tigetinmin. Shashtaryn jóndep, túrli kostıýmder oılap taýyp, áýre bolyp júretinmin.
Basqa jumysta istesem de balalyq armanymdy bir sát umytpadym. Bul ispen qańtar aıynan bastap aınalysa bastadym, - deıdi sheber.
Qýyrshaqtardy jasaýǵa sapaly, qymbat materıaldardy qoldanady.
- Eń aldymen qýyrshaqtyń basyn jasaımyn. Odan keıin qańqasy jasalady. Oǵan symdy qoldanamyn, qol-aıaǵy qımyldaıdy. Basy da qozǵalady, sharnırge ornatylǵan.
Qýyrshaqty jasaý úshin kitaptyń, ınternettiń kómegine júginýge týra kelip jatady. Máselen, qaraqshynyń kostıýmin tikkende sol zamanda qalaı kıingenin zerttedim, keıbirin oıymnan qostym.
Akssessýarlaryn da umytpaımyn, bul qaraqshynyń saýsaǵynda júzigi de, tapansha men qylyshy da bar, Bul jumysta eń qıyny – basyn jasaý, sáıkestikti saqtaý kerek. Keıin polımerlik balshyqty durys qyzdyrý qajet. Onyń da óz ýaqyty jáne temperatýrasy bar. Odan keıin birneshe kezeńmen tegisteımiz, - deıdi Evgenııa Krýtevıch.
Sheber bir qýyrshaqty jasaýǵa eń keminde eki apta ýaqytyn jumsaıdy.
- Bul – sáıgúlik ústindegi bozbala. Astyndaǵy atyn polımer balshyqtan jasadym. Er-turman, júgenin isteýge taza bylǵaryny qoldandym. Basyndaǵy malaqaıy, kıimi kúzen terisinen tigildi.
Alǵash ret janýardy istedim. Oıymda júrgen áli talaı joba bar, jylqy maly unaıdy, sol sebepti bul túliktiń áli túr-túrin isteımin.
Ázirge at qoıǵan joqpyn. Ádette, qýyrshaqtaryma at beremin, myna sulýdyń aty – Aıgúl. Ertegi keıipkerlerin jıi jasaımyn, - deıdi Petropavl turǵyny.
Evgenııa Krýtevıch qýyrshaqtar kollektsııasyn áli de tolyqtyryp, avtorlyq kórmesin jasaýdy armandaıdy.
Buǵan deıin Jańaarqa sheberleri Qazaqstan rekordtar kitabyna engenin jazǵan edik.
