Petropavl turǵyny kóshedegi shuńqyrǵa kóligin zaqymdap, shyǵyndy sot arqyly óndirdi

PETROPAVL. KAZINFORM – Petropavlda júrgizýshi kóshedegi shuńqyrǵa zaqymdaǵan kóligi úshin «Qyzyljar sý» JShS-nen 500 myń teńgege jýyq qarajat óndirip aldy.

Petropavl qalasynyń №2 sotynyń málimetinshe, oqıǵa byltyr mamyr aıynda Petropavldaǵy Abaı kóshesiniń boıynda bolǵan. Munda jóndeý jumystarynan keıin asfaltta shuńqyr paıda bolyp, turǵynnyń kóligi zaqymdanǵan.

- Ákimshilik quqyq buzýshylyq týraly hattamaǵa sáıkes, «Qyzyljar sý» JShS basshysy jaýapkershilikke tartyldy. Sotqa aryzdanýshy 500 myń teńgege jýyq materıaldyq zalal keltirilgenin kórsetip, jaýapkerden shyǵyndy óndirýdi surady. Keltirilgen materıaldyq shyǵyn baǵalaý aktisimen rastaldy, - delingen sot habarlamasynda. 

Sottalýshy jaq óz kinásin moıyndamaı, Petropavl qalasy Abaı kóshesindegi káriz kollektorynyń jóndeý jumystaryn merdiger mekeme júrgizgenin alǵa tartty.

Alaıda, sotta talapqa saı jumys istemegeni jáne jol belgisiniń joqtyǵy úshin jaýapkershilik merdigerge júktelmeı, kerisinshe osy úshin jaýapkerge ákimshilik aıyppul salynǵanyn anyqtaldy. 

Nátıjesinde sot «Qyzyljar sý» JShS-ni keltirgen zalal úshin azamattyq-quqyqtyq jaýapkershilikke tartty, sebebi oqıǵa ornyndaǵy jerasty kommýnıkatsııalary onyń balansynda. Petropavl qalasynyń №2 soty talapkerdiń ótinishin qanaǵattandyryp, «Qyzyljar sý» JShS-nen keltirilgen zalal somasyn óndirip aldy.

Buǵan deıin SQO-da tutynýshy ótinishin elemegen kompanııa 6,2 mln teńge aıyppul tólegenin jazǵan edik.