Petropavl turǵyny ınternet alaıaqtarǵa aldanyp, páterinen aıyryldy

PETROPAVL. KAZINFORM - Soltústik Qazaqstan oblysynda qańtar aıynda ınternet alaıaqtyqtyń 33 deregi tirkeldi. Bul ótken jyldyń uqsas kezeńimen salystyrǵanda 16-ǵa az.

Óńir polıtseıleriniń aıtýynsha, bıylǵy ınternet alaıaqtyq faktileriniń 19-y «bankten qońyraý shalý» tásilimen jasalǵan.

- Ádette qylmyskerler «domofondy aýystyrý», «eseptegishti tekserý», «emhanadaǵy kezekti naqtylaý» sııaqty syltaýlarmen qońyraý soǵady. Negizgi maqsat - SMS arqyly kelgen kodty aıtqyzý. Osydan keıin qylmystyq shemanyń ózge qatysýshylary «oıynǵa» qosylyp, álgi kodtyń kómegimen alaıaqtar onyń shottaryna qol jetkizgenin, atyna nesıe rásimdegenin nemese turǵyn úıin saýdaǵa shyǵarǵanyn habarlaıdy, - deıdi tártip saqshylary.

Budan keıin «qorǵaný» úshin jábirlenýshige jınaq aqshasyn sheship alý, «aına nesıeler» rásimdeý, páterin shuǵyl satý jáne barlyq qarajatty «qaýipsiz shotqa» aýdarý usynylady.

Petropavldyń 53 jastaǵy turǵyny alaıaqtardyń osy tásiline túsip, páterinen aıyryldy. 2025 jyldyń qarasha-jeltoqsan aılary aralyǵynda ol «bank menedjeriniń» nusqaýlaryn oryndap, aqshany kezeń-kezeńimen alaıaqtarǵa aýdarǵan. Tek qańtardyń basynda ǵana ózin aldanǵanyn túsingen. Keltirilgen shyǵyn kólemi 18 mıllıon teńgeden asty.

Qazirgi ýaqytta sotqa deıingi tergep-tekserý júrip jatyr.

- SMS arqyly keletin tórt tańbaly kodty bógde adam ózdiginen qoldanyp, nesıe rásimdeı almaıdy. Alaıda ol kıberalaıaqtarǵa jeke derekterge qol jetkizýge jol ashady. Osyndaı málimetterdi ıelengen qylmyskerler memlekettik organ qyzmetkerleriniń keıpine enip, jalǵan qujattar daıyndaýy múmkin. Mysaly, WhatsApp messendjeri arqyly jalǵan satyp alý-satý shartynyń jobasyn jiberip, jábirlenýshini páterin jedel satýǵa kóndirýge tyrysady, - deıdi polıtseıler.

Buǵan deıin kıberpolıtseıler birneshe alaıaqtyq shemaǵa qatysy bar dropperdi ustaǵanyn jazǵan edik.