Petropavl turǵyny asyrap alǵan jetim balasyn memleketke qaıtaryp, al onyń páterin jalǵa bergen
Soltústik Qazaqstan oblysynyń prokýrorlary Petropavl turǵynynyń óz qamqorlyǵyna alǵan jetim balanyń quqyǵyn buzyp kelgenin anyqtady, deıdi QazAqparat tilshisi.
SQO prokýrorlary balalar úıinde zańnamanyń saqtalýyna qatysty taldaý júrgizý barysynda qamqorshynyń quqyqtaryn asyra paıdalaný arqyly kámeletke tolmaǵan balanyń quqyqtaryn dóreki buzý faktisin anyqtady.
Petropavl qalasynyń ákimdigi bekitken qamqorshy S. quqyǵyn asyra paıdalanyp jáne «Neke jáne otbasy týraly» kodeks talaptaryn buza otyryp, qamqorshylyq organynyń ruqsatynsyz uzaq ýaqyt boıy jetim balanyń páterin zańsyz jalǵa berip kelgen.
Ol óziniń zańsyz áreketin balany balalar úıine qaıtarǵannan keıin de jáne qamqorshylyq alynǵannan keıin de jalǵastyra bergen.
Anyqtalǵan zań buzýshylyq boıynsha qadaǵalaý organy kináli laýazymdy tulǵalardy jaýapkershilikke tartý jáne sáıkes sharalardy qabyldaý arqyly zańbuzýshylyqty joıý jóninde usynys engizdi.
Sondaı-aq osy faktige qatysty 12 qyrkúıekte prokýratýra organdarynyń materıaldary boıynsha Petropavl qalasynyń polıtsııasy QR Qylmystyq kodeksiniń 142-baby «Qorǵanshy nemese qamqorshy quqyqtaryn teris paıdalaný» boıynsha sotqa deıingi tergep-tekserýdi bastady.
Qazirgi ýaqytta balaǵa keltirilgen shyǵyndy anyqtaý maqsatynda sotqa deıingi tergeý júrip jatyr.
Іs oblys prokýratýrasynyń baqylaýynda bolady.
