Petropavl turǵyndarynyń sý úshin bereshegi 34 mln teńgeden asty

PETROPAVL. KAZINFORM – Petropavl turǵyndarynyń sýmen qamtý kompanııasyna qaryzy 34 mln teńgeden asty. Onyń shamamen 20 mln teńgesi ótken jyldardyń bereshegi.

«Qyzyljar sý» JShS-niń qala turǵyndary arasynda 95 259 abonenti bar. Sondaı-aq oblys ortalyǵyndaǵy barlyq 3790 kásiporyn osy kompanııanyń qyzmetine júginedi. Mamandardyń aıtýynsha, halyq aıyna 4931 myń m3 sý tutynady, bul barlyq kólemniń 75%, qalǵany zańdy tulǵalarǵa tıesili. 

Alaıda, olardyń arasynda tutynǵan sýy úshin kommýnaldyq aqyny tólemeıtinder de bar. Máselen, bir petropavldyq otbasynyń qordalanǵan qaryzy 322 myń teńgeden asqan. Bul úsh jylda jınalǵan bereshek. 

«Byltyr osy ýaqytta turǵyndar 30 mln teńge bereshek bolsa, bıyl ol soma 34 mln teńgeden asty. Qaryzdy qaıtarǵyzý úshin aldymen eskertemiz. Bereshegi barlarǵa avtomatty túrde telefon soǵylady. Nátıje bolmasa, qujattardy jınap, sotqa beremiz. Byltyr 9,5 mln teńge bereshegi bar 452 abonentti sotqa berdik, sonyń 5,6 mln teńgesi óndirilip alyndy. Bıyl 4,5 mln teńge qaryz boıynsha 225 adamnyń isi boıynsha sot sheshimi shyqty. Búginde 3,2 mln teńge shamasynda qaıtaryldy», - deıdi «Qyzyljar sý» JShS-niń satý jáne sý-tehnıkalyq baqylaý qyzmetiniń basshysy Bolat Salahýtdınov. 

Mamannyń aıtýynsha, sottyń sheshimi boıynsha bereshegi bar páterge kárizdik biteýish te salynady. Bıyl 37 tutynýshyǵa qyzmetti paıdalanýǵa osyndaı shekteý qoıylǵan. 

Buǵan deıin Soltústik Qazaqstan oblysynda ruqsat etilmegen oryndarda sýǵa shomylǵandarǵa aıyppul salynǵanyn jazǵan edik.