Petropavl sý qoımasyna 6 mıllıonǵa jýyq shabaq jiberildi
PETROPAVL. QazAqparat - Petropavl sý qoımasyna memlekettik tapsyrys negizinde 6 mln-ǵa jýyq aqsaha tuqymdas shabaq jiberildi, dep habarlaıdy QazAqparat tilshisi.
«Petropavl balyq pıtomnıgi» kásipornynyń mamandary jospar boıynsha bıyl jergilikti kólderge 46 mln qurtshabaqtardy jiberýi qajet. Bul jumystarǵa respýblıkalyq bıýdjetten 42 mln-nan astam teńge kóleminde qarajat bólingen.
Sý qoımalaryn balyqpen baıytý jumystary bastalyp ketti. Qarasha aıynan bastap arnaıy apparattarda ósirilgen aqsaha tuqymdas balyqtyń shabaqtary búgin Petropavl jáne Sergeev sý qoımalaryna jiberildi.
Mamandardyń aıtýynsha, shabaqtar jarty jyl boıy ınkýbatsııalyq tsehta jetildi. Olar ólip qalmaýy úshin tsehtyń ishi 1 gradýs jyly, sýdyń temperatýrasy + 6-7 gradýstan tómendemeýi tıis. Ósirilgen shabaqtar sý qoımalaryna polıetılen pakettermen jetkiziledi. Osy joly Petropavl sý qoımasyna qapshyqtyń 59-y ázirlendi. Árqaısysynda shamamen 100 myń qurtshabaq bar.
«Búgin bizdiń kásiporyn memlekettik tapsyrys boıynsha sý qoımalaryn balyqtandyra bastady. Bıyl jospar boıynsha aqsaha balyǵynyń 46 mln 282 myń qurtshabaǵyn eki sý qoımasyna jiberýimiz kerek. Búgin Petropavl sý qoımasyna 5 mln 900 myńyn jibersek, qalǵanyn Sergeev sý qoımasyna aparamyz», - deıdi «Petropavl balyq pıtomnıgi» RMQK dırektory Erjan Jumabaev.
Al kúz mezgilinde kólderge tuqy balyǵynyń 1 mln 66 myń shabaǵyn jiberý josparlanǵan. 
