Petropavl soty basketbolshy Nanaevtyń óliminiń mán-jaıyn anyqtaýda
PETROPAVL. QazAqparat - Petropavlda basketbolshy Igor Nanaevtyń ólimine qatysty is boıynsha ekinshi sot otyrysy ótti, dep habarlaıdy «QazAqparat» HAA tilshisi.
2,5 saǵatqa sozylǵan otyrys barysynda kýágerler Aleksandr Antropov pen Aıgúl Qaıyrjanovadan jaýap alyndy.
A.Antropov sotqa qaza bolǵan Igor Nanaevtyń dosy bolyp tabylatynyn aıtty. Olar sol keshte «Park Sıtı» túngi klýbyna Nanaevpen birge barǵan.
Antropovtyń sózine qaraǵanda, ol ǵımarattyń aldynda turǵan sottalýshylar - Mendibaev, Áskerov pen Qaıbarovty jáne eki qyzdy kórgen (Qaıyrjanova men Ámrenova). Shylym shegip turǵan qyzdardyń janyna taıanyp, sirińke suraǵan. Olardy sportshylarǵa uqsatqannan keıin, áńgimelese bastaǵan. Keıin jandaryna Mendibaev kelip, Antropovtyń qyzdarmen sóılesip turǵanyn jaqtyrmaǵan.
«Biz jaı ǵana sóılesip turǵanymyzdy jetkizdim. Qyzdar da sony aıtty», - deıdi ol. Budan ári qastaryna Áskerov pen Qaıbarov taıanǵan. Sol kezde Antropov soqqyny sezingen. Ol túngi klýbqa qaıta kirip, Nanaev pen Kýznetsovqa mán-jaıdy aıtqan. Olar jınalyp, buzaqylarmen sóılesýge barǵan. Antropov sottalýshy Áskerovpen ekeýara sóılesip turǵan kezde Nanaevtyń ony uryp jatqandyǵy týraly daýysy estilgen. Biraq Antropov Nanaevty kim jáne qalaı urǵanyn kórmegenin aıtýda. Sebebi tóbeles barysynda basyn qolmen jaýyp turǵan.
Aıgúl Qaıyrjanova bolsa, oryn alǵan oqıǵany emis-emis biletinin aıtyp otyr. Sebebi alkogoldi mas kúıinde bolǵan. Ol da Nanaevqa soqqyny kim jasaǵanyn aıta almady.
Basketbolshy Igor Nanaev 10 qazan kúni Petropavldaǵy oblystyq aýrýhanada jan tapsyrdy. Jergilikti «Bars» klýbynyń múshesi qazannyń 2-sinen 3-ine qaraǵan túni túngi klýbta bolǵan tóbeles kezinde aýyr jaraqattar alǵan bolatyn. Sportshy ólimine baılanysty júzdegen adamnan jaýap alyndy. Kúdiktiler arasynda SQO kolledjderiniń stýdentteri de bar. Іs boıynsha 5 adam aıyptalýda.
Kelesi sot otyrysy 2017 jyldyń 20 qańtaryna belgilendi.
