Petropavl saıabaqtarynyń birinen tabylǵan granata oqytý quraly bolyp shyqty
PETROPAVL. QazAqparat – Petropavldaǵy saıabaqtardyń birinen jarylǵysh zatqa uqsas zat tabyldy, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, 23 tamyz kúni Petropavldaǵy eski saıabaqtyń aýmaǵynda shóp shaýyp júrgen jumysshy jerde jatqan granataǵa uqsas zatty kórgen. Ol bul jaıynda sol mańdaǵy modýldi bekette kezekshilik atqaryp, aýmaqty tekserýge shyqqan patrýldi polıtsııa batalonynyń qyzmetkerine aıtqan. Inspektor oqıǵa týraly «102» nómirine habar berip, jarylǵysh zat bolýy múmkin aımaqty kúzetýge aldy.
Birer mınýtta arnaıy mamandar jetip, qaýipti bolýy múmkin zatty tekserdi. Nátıjesinde onyń «ÝZRGM» tıpti oqytý granatasy ekendigi anyqtaldy. Mundaı oqý quraly alǵashqy áskerı daıyndyq páninde qoldanylady jáne esh qaýip tóndirmeıdi.
Tártip saqshylary kúdik týdyrǵan zat tabylǵan jaǵdaıda ony ustaýǵa, ornynan qozǵaýǵa bolmaıtynyn eske salady. Onyń qaýipsiz ekendigin tek mamandar ǵana aıta alady, sondyqtan aldyn ala ózdiginen sheshim shyǵarmaǵan jón. Mundaıda birden polıtsııaǵa habarlap, mamandardyń kelgenin kútken jón.
Buǵan deıin belgisiz bireýdiń Petropavldaǵy sottardyń ǵımaratyna jarylǵysh zat qoıylǵandyǵy týraly habarlaǵanyn aıtqan edik.
Bul qalalyq №2 jáne mamandandyrylǵan aýdanaralyq ekonomıkalyq sotynyń jumysyn bir saǵatqa tejedi, keı sot otyrystaryn keıinge qaldyrýǵa týra keldi. Ǵımaratty tekserý kezinde jarylǵysh zat tabylmady.
