Petropavl polıtseıleri adasqan elikti qutqardy
PETROPAVL.KAZINFORM – Bıylǵy qysta janýarlardyń kóship-qonatyn mekeni men jolynyń ózgerýine baılanysty oblystyń aýyl aımaqtaryna elikter kóptep kelgishteı bastaǵan.
Soltústik Qazaqstan oblysy Polıtsııa departamenti qyzmetkerleri júrgizýshilerge tek qala syrtyndaǵy trassalarda ǵana emes, aýyl ishinde de elikterdiń kezdesýi múmkin ekenin eske salady.
Petropavldaǵy Jumysshy kentiniń aýmaǵynda adasyp júrgen elikti turǵyndardyń kózi shalǵan. Mamandar bul óz kezeginde jol-kólik oqıǵasyna sebepshi bolýy múmkin ekenin aıtyp, eskertedi. Jergilikti turǵyndar bul týraly «102» arnasyna habarlaǵan. Shaqyrýǵa tabıǵatty qorǵaý polıtsııasynyń qyzmetkerleri men qoryqshylar kelip jetti. Olar № 43 mektep stadıonynda óz úıirinen kóz jazyp qalǵan elikti ustap, ormanǵa jetkizdi.
«Qazirgi ýaqytta tuıaqty jabaıy janýarlardy aýlaýǵa tyıym salynǵanyn eskertemiz. 3 myń aılyq eseptik kórsetkish aıyppuldan 10 jylǵa deıin bas bostandyǵynan aıyrý kózdelgen qylmystyq jaýapkershilik tónetinin umytpaýlaryńyzdy suraımyz», — deıdi SQO PD JPQ basqarmasy tabıǵatty qorǵaý polıtsııasy tobynyń erekshe tapsyrmalar jónindegi aǵa ınspektory polıtsııa podpolkovnıgi Ashat Qojabaev.
Aqpan aıynda tabıǵatty qorǵaý polıtsııasynyń qyzmetkerleri «Brakoner» jedel-profılaktıkalyq is-sharasy aıasynda jumys istep jatqandaryn eske salaı keteıik. SQO polıtseıleri múddeli organdarmen birlesip ańshylyq sharýashylyqtary men qorǵalatyn tabıǵı aýmaqtar boıynsha reıdterge kiristi. Maqsaty – tabıǵı resýrstardy brakonerlik paıdalaný, ań jáne balyq aýlaý erejelerin buzý faktilerin anyqtaý jáne jolyn kesý.
