Petropavl polıtsııasynyń servıstik modeli oń nátıje kórsetýde
PETROPAVL. QazAqparat - Soltústik Qazaqstan oblysyna is-sapar aıasynda Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev Petropavl qalasy polıtsııa basqarmasynyń front-ofısine bardy, dep habarlaıdy QazAqparat tilshisi.
Memlekettik qyzmet isteri jáne sybaılas jemqorlyqqa qarsy is-qımyl agenttiginiń SQO boıynsha departamenti baspasóz qyzmetiniń habarlaýynsha, front-ofıske kúnine ártúrli suraqtarmen shamamen 75 turǵyn júginedi. Front-ofıs 4 sektorǵa bólingen: jalpy máseleler, ákimshilik, anyqtaý jáne tergeý, halyqty qujattandyrý jáne tirkeý zaldary. Kútýge qolaıly jabdyqtalǵan, tegin Wi-fi jelisi, bankomat jáne memlekettik baj salyǵy men ákimshilik aıyppuldar tóleý úshin termınal bar.
Sonymen qatar, Connection point ózine-ózi qyzmet kórsetý buryshy jumys isteıdi. Elektrondyq úkimet portalynda óz betińshe elektrondyq qyzmetterdi alýǵa múmkindik bar. Polıtsııa basqarmasynyń bastyǵy aı saıyn front-ofıs bazasynda azamattardy jeke máseleler boıynsha qabyldaıdy. 
«Qyzmet babymen Qazaqstannyń basqa da qalalarynda jıi bolamyn. Baıqaǵanym, ázirshe tek Petropavl polıtsııasynda ǵana front-ofıs bar. Bul tájirıbe aqparat alýdy jeńildetedi. Sondaı-aq, ishki ister organdarynyń qyzmetkerlerimen ózara is-qımyl úshin óte yńǵaıly», - deıdi petropavldyq Natalıa Alekseenko.
Sonymen qatar, agenttik tóraǵasyna polıtsııa qyzmetkerlerine arnalǵan adaldyq dúkeni kórsetildi.
«Polıtsııa qyzmetiniń ashyqtyǵy, halyq úshin qolaıly jaǵdaı týǵyzý jáne ákimshilik kedergilerdi qysqartý - bul qazirgi qoǵamnyń qajetti talaptary» - dep atap ótti Alık Jatqambaıuly.
Agenttik tóraǵasy Petropavl qalasy polıtsııa basqarmasynyń jumysyna oń baǵa berip, qyzmetti jetildirý boıynsha jumysty jalǵastyrýdy usyndy.
