Petropavl polıtseıleri jurttyń 40 mln teńgesin jymqyrǵan áıeldi ustady
PETROPAVL. QazAqparat - Petropavl polıtseıleri halyqtyń 40 mln-ǵa jýyq teńgesin qaltasyna basty degen kúdikpen 38 jastaǵy áıeldi ustady, dep habarlaıdy QazAqparat tilshisi.
SQO PD baspasóz qyzmetiniń málimetinshe, Petropavl qalalyq Polıtsııa basqarmasyna Qyzyljar aýdanynyń birneshe turǵynynan alaıaqtyqqa qatysty aryz túsken. Kúdikti, Qyzyljar aýdany Beskól eldi mekeniniń 38 jastaǵy turǵyny qamaýǵa alyndy.
«Ol jurtpen tanysyp, aqsha aınalymy bıznesi baryn, qarjy salý arqyly tez tabys tabýǵa bolatynyn aıtqan. Ádette 100 myń teńge salǵyzyp, keıin ony 120 myń teńge etip qaıtarǵan. Osylaısha jurttyń senimine kirip, aınalymǵa úlken soma - mıllıondar salynǵan kezde alaıaq onyń bir bóligin protsent retinde qaıtarǵan. Al qalǵanyn suraǵandarǵa «aqsha jumys istep jatyr» degen syltaý aıtyp, qosymsha qarajat salýdy suraǵan. Zardap shekkender kelisken», - deıdi Petropavl qalalyq Polıtsııa basqarmasy tergeý bóliminiń bastyǵy Marat Janǵojınov.
Polıtseılerdiń aıtýynsha, jurt paıda kórý úshin bankten nesıe alǵan, aınalymǵa aqsha salýǵa týǵan-týystaryn kóndirgen.
«Bir jaǵdaıda kúdikti zardap shegýshiden 27 mln teńge alǵan. Bul ispen ol 2018 jyldan aınalysa bastapty. Jurt polıtsııaǵa aryzdanbas buryn ýáde etilgen túsimdi aılap kútken», - deıdi Marat Janǵojınov.
Bul fakti QR QK 190-babynyń 3-bólimi «Alaıaqtyq» boıynsha Sotqa deıingi tergep-tekserýlerdiń biryńǵaı tizilimine engizildi. Qazir kúdiktiniń birneshe iske qatystylyǵy anyqtalyp, qamaýǵa alyndy. Zardap shekkender anyqtalýda. Ázirshe keltirilgen shyǵyn mólsheri 40 mln teńge shamasynda.
