Petropavl polıtseıleri qylmys úshin izdeýde júrgen beseýdi qańǵybastar arasynan tapty
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavl qalalyq polıtsııa basqarmasynyń qabyldap-taratý orny qyzmetkerleri kúndelikti saǵat 15.00-den 23.00-ge deıin qańǵybastar kóp shoǵyrlanǵan oryndardy – jylý qubarlarynyń mańyn, bos ǵımarattardy, jertóleler men qudyqtardy tekseredi. Turaqty mekenjaıy joqtardy keıin tártip saqshylary arnaıy esepter boıynsha tekserip, daktıloskopııa jasaıdy, foto-, vıdeo esepke alynyp, qylmystarǵa qatystylyǵy anyqtalady.
«Budan basqa turǵyndardan kelip túsetin shaǵymdarmen jumys isteımiz. Taǵy bir fakti Instagram jelisi arqyly anyqtaldy. Aqparatty tekserý barysynda polıtseıler «Qazaqstan» kınoteatry aýdanynda turǵyndardy mazalaǵan qańǵybastar tobyn anyqtady. Osyǵan uqsas jaǵdaılarda 87152 59-92-99 nómiri arqyly kezekshi bólimge, «102» arnasyna tikeleı habarlasýǵa nemese «102» mobıldi qosymshasyn qoldanýǵa bolady. Mobıldik qosymsha qońyraý soǵýǵa da, polıtsııaǵa aýdıo jáne beınefaıldardy, mátindik habarlamalardy joldaýǵa da múmkindik beredi. Habarlamalar túsken kezde birden tekseremiz», - deıdi Petropavl qalalyq polıtsııa basqarmasy qabyldap-taratý ornynyń bastyǵy Adaı Smaıyl.
Jeke bastaryn anyqtaǵan soń turǵylyqty mekenjaıy joq adamdar túneý ornyna jetkiziledi. Túneý orny aýa raıynyń sýytýyna baılanysty, 1 qazannan jumysyn qaıta bastady. Polıtseıler túneý ornyna kúnine shamamen 10-15 adamdy jetkizedi.
Jyl basynan polıtseıler qabyldap-taratý ornyna turaqty mekenjaıy joq adamdardy 1480 ret jetkizgen. Tekserý barysynda olardyń arasynan qylmystyq iske baılanysty izdeýde júrgen 5 adam anyqtaldy.