Petropavl polıtseıleri kúdiktiden jaýap alý kezinde esirtki jasyrylǵan 15 oryndy anyqtady

ASTANA. QazAqparat - Petropavl polıtseıleri kúdiktiden jaýap alý nátıjesinde esirtki jasyrylǵan 15 oryndy anyqtady, – dep habarlaıdy Polisia.kz.

SQO PD esirtki qylmysyna qarsy is-qımyl basqarmasynyń jedel ýákilderine Petropavl qalasynyń 21 jastaǵy turǵynynyń sıntetıkalyq esirtkilerdi taratý maqsatynda esirtki jasyrýǵa qatysy bar bolýy múmkin ekeni týraly aqparat kelip tústi.

Ol aqpan aıynda jedel-izdestirý sharalarynyń nátıjesinde ustaldy. Jeke tintý kezinde odan aq tústi untaq tárizdi zat salynǵan 10 polımerlik túıinshek tárkilendi. Jas jigittiń jaýaby boıynsha polıtseıler qala ortalyǵynan esirtki jasyrylǵan taǵy 15 oryndy anyqtady. Barlyǵy 20,22 gramm bolatyn esirtki tárkilendi, saraptama qorytyndysy boıynsha bul α-PvP sıntetıkalyq preparaty bolyp shyqty.

– Atalǵan fakti QR Qylmystyq kodeksiniń 297-babynyń 3-bóligi boıynsha sotqa deıingi tergep-tekserýlerdiń biryńǵaı tiziliminde tirkeldi. Sottyń sanktsııasy boıynsha kúdikti qamaýǵa alyndy. Jyl basynan oblysta esirtki satty degen kúdikpen barlyǵy 22 adam ustaldy, onyń 12-si – 18 ben 25 jas aralyǵyndaǵylar. Qylmystyq jolmen ońaı oljaǵa kenelýdi tańdaǵan jastar óz taǵdyrlaryn buzady: psıhotroptyq zattardy satý úshin qatań jaza qarastyrylǵan. Esterińizge sala keteıik: QR QK-niń 297-babynyń 3-bóliginiń sanktsııasy boıynsha 10 jyldan 15 jylǵa deıin bas bostandyǵynan aıyrý jazasy kózdelgen, – deıdi SQO PD esirtki qylmysyna qarsy is-qımyl basqarmasynyń bastyǵy Ivan Terzıdı.