Petropavl pandemııaǵa baılanysty 1,4 mlrd teńge kirisinen aıyryldy

PETROPAVL. QazAqparat – Petropavl ákiminiń eseptik kezdesýine qatysqan Soltústik Qazaqstan oblysynyń ákimi Qumar Aqsaqalov pandemııanyń qala ekonomıkasyna áseri jaıynda aıtty. Oblys ortalyǵy byltyr 1,4 mlrd teńge kirisinen aıyryldy, dep habarlaıdy QazAqparat tilshisi.

Karantındik shekteýler engizilgeli SQO-da birqatar shaǵyn jáne orta bıznes sýbektileri jumysyn toqtatýǵa májbúr boldy. Saldarynan Petropavl 1,4 mlrd teńge kirisinen aıyryldy. SQO ákimi Qumar Aqsaqalovtyń aıtýynsha, kásipkerler zaman aǵymyna saı beıimdelýi kerek bul máseleni olar óz paıdasyna sheship, ári qaraı damýǵa berilgen múmkindik dep qaraýy qajet.

«Petropavl – ónerkásiptik kásiporyndar kóptep ornalasqan qala. Alaıda 90-shy jyldary olardyń basym bóligi bankrot dep tanyldy. Sońǵy jyldary biz 107 myń sharshy metr bos ǵımarattardy iske qostyq. Taǵy 92 myń sharshy metrinde – birneshe jobany júzege asyrý boıynsha jumystar júrip jatyr.

Qazir oblys boıynsha jalpy aýmaǵy 100 myń sharshy metr bos turǵan nysandar bar. Olardyń basym bóligi Petropavlda ornalasqan. Qala basshysy men meniń orynbasarlarymnyń birinshi kezektegi mindetteri jańa ınvestorlar tabý», - dedi Qumar Aqsaqalov.

Investorlarǵa Petropavlda qolaıly jaǵdaılar qarastyrylǵan. Ónimi eksportqa baǵyttalǵan kásiporyndardy biriktiretin «Qyzyljar» arnaıy ekonomıkalyq aımaq ta qurylǵan.

«QR Prezıdentiniń tapsyrmasymen 2025 jylǵa deıingi keshendi jospar bar. Nátıjesinde buryn-sońdy bolmaǵan jeńildikter jasalyp jatyr. Oblystan qomaqty qarajat bólinedi. Petropavl bıznes júrgizýge qyzyqtyratyndaı bolýy kerek. Alaıda másele bar. 2020 jyldyń qorytyndysy boıynsha jeke ınvestıtsııalar boıynsha azyn-aýlaq qana – nebári 2% ósim bar. Qala barlyq aldyńǵy qatarly jobalardy júzege asyrýy tıis» - dedi SQO ákimi.

Buǵan deıin Qumar Aqsaqalovtyń óńirde karantındik shekteýlerdi jeńildetý máselesin qaraıtynyn aıtqan edik.