Petropavl óńiraralyq forýmǵa qalaı daıyndalyp jatyr
PETROPAVL. QazAqparat - Soltústik Qazaqstan oblysyndaǵy Qazaqstan Respýblıkasy Premer-Mınıstriniń birinshi orynbasary Asqar Mamınniń qatysýymen ótken jıynda óńiraralyq forýmǵa daıyndyq máseleleri talqylandy, dep habarlaıdy «QazAqparat» HAA tilshisi.
Forým bıyl Petropavl qalasynda jalǵasady. Asqar Mamın atalmysh basqosý ótken jyly Reseıdiń Chelıabi qalasynda ótkenin aıtty. Byltyr joǵary deńgeıde uıymdastyrylǵan forýmnyń bıylǵy jalǵasy da barlyq talapqa saı bolýy qajet.
«Qazaqstan men Reseıdegi týrızmdi damytýdyń jańa joldary men tendentsııalary» taqyryby talqylanady. Biz týrızm salasyna erekshe nazar aýdaryp otyrmyz. Ózindik zor áleýetke ıe Petropavl qalasy da tegin tańdalyp otyrǵan joq. Eger bizdiń eldi aralaýǵa keletin jáne bizdiń ónimderdi paıdalanatyn týrıster týraly aıtatyn bolsaq, biz kóp jaǵdaıda reseı naryǵyna baǵdar jasaımyz»,-dedi A.Mamın.
SQO daǵy forýmǵa daıyndyq jumystary qalaı júrgizilip jatqany týraly oblys ákimi Qumar Aqsaqalov aıtyp ótti.
Qonaqtardyń basym bóligi áýe jáne avtomobıl joldarymen keletinin esepke ala otyryp, qalanyń ońtústik bóligine aýqymdy jóndeý jumystaryn júrgizip jatyrmyz. Ol jerde 50-60 jyldary salynǵan jer úıler bar. Jańa úıler turǵyzylyp, barlyq kóshe jóndeýden ótedi,-dedi aımaq basshysy.
Qalada kóp jyldar boıy qolǵa alynbaǵan kóshelerdi jaryqtandyrý jumystary júrgizilip, jańa shamdar ornatylýda.
«Temir jol vokzaly da kóp jyldar boıy jóndeý kórmegen. Ǵımarattyń ishi men syrty jańǵyrtýdan ótedi. Lıft ornatylyp, jolaýshylardyń perronǵa shyǵýy jeńildeıdi. Jumystar eki jyl kóleminde aıaqtalady»,-deıdi Qumar Aqsaqalov.
Qalada kósheler men aýlalardy qalpyna keltirý jumystary da qarqyn júrgizilýde. Mul maqsatqa da kóp jyldar kóleminde qarjy bólinbeı kelgen. Oblys ákiminiń aıtýynsha, QR Úkimetiniń qoldaýy jáne jergilikti rezervtiń kúshimen abattandyrý isi de aldaǵy ýaqytta támamdalyp qalmaq.
Taǵy bir másele - qonaqúıler. Óńir basshysy qazirdiń ózinde 750 oryndyq qonaq úı daıyn turǵanyn jáne eki qonaq úı ǵımaraty turǵyzylyp jatqanyn jetkizdi.
«Bizdiń esebimiz boıynsha, forým mezgilinde qalaǵa myńnan astam qonaq kelmek. Olardyń kópshiligi erterek jetedi. Qonaq úılerde kem degende 1,2 myń oryn bolýy qajet. Ázirge oryndar jetkiliksiz bolyp tur. Máseleni aldaǵy ýaqytta sheshemiz,-dedi Asqar Mamın.
Ákimniń aıtýynsha, qonaqtardy Petropavldaǵy 27 meıramhana kútip almaq.
