Petropavl men Sharm-El-Sheıh arasynda áýe reısi ashyldy
PETROPAVL. QazAqparat - Petropavl halyqaralyq áýejaıynan Mysyr eliniń Sharm-El-Sheıh kýrortyna tikeleı áýe reısy ashyldy. Bul jóninde SQO jolaýshylar tasymaly jáne avtomobıl joldary basqarmasynyń alqa otyrysynda belgili boldy, dep habarlaıdy QazAqparat tilshisi.
Petropavl áýejaıynyń halyqaralyq mártebesi bolǵanymen ázirshe tek Astana, Almaty jáne Shymkent qalalarynan áýe reısterin qabyldaıdy. 2018 jyly áýejaıdyń qyzmetin 17 myńnan asa jolaýshy paıdalanǵan, bul 2017 jylmen salystyrǵanda 13 % kóp.
«Áýe reısteriniń sanyn ulǵaıtý kerek. Baǵa qazir kóńilge qonymdy. Astanaǵa deıin bılet quny bar bolǵany 10 myń teńge. Jolaýshylardyń sany birshama ósti. Bul jumysty odan ári kúsheıtý qajet. Biz áýejaıdy basqarýdy jeke kompanııalar men sheteldik ınvestorlarǵa berýge daıynbyz»,- dedi oblys ákimi Qumar Aqsaqalov.
SQO ákimdigi baspasóz qyzmetiniń habarlaýynsha, oblysta tanymal sheteldik kýrorttarǵa áýe reısterin ashý boıynsha qarqyndy jumys atqarylýda. Jazda soltústikqazaqstandyqtar Mysyr eliniń Sharm-El-Sheıh kýrortyna Petropavldan tikeleı reıspen ushyp bara alady.
«Búgingi tańda Petropavl áýejaıy, «Skat» áýekompanııasy men jergilikti týrfırmamen Sharm-El-Sheıh kýrortyna tikeleı áýe reısin ashý týraly kelisimge keldik. Ushaqtar shilde aıynan qyrkúıekke deıin, ıaǵnı jaz aılarynda qatynaıtyn bolady», - dedi SQO jolaýshylar tasymaly jáne avtomobıl joldary basqarmasynyń basshysy Vladımır Balahontsev.
Petropavldaǵy týrfırmalardyń biri Qyzyl teńiz jaǵalaýyndaǵy demalys oryndaryna bıletterdi brondap sata bastady. Maýsymnyń 19-yna josparlanǵan on kúndik demalys úsh juldyzdy qonaq úıde shamamen 222 myń teńge turady. Sharm-El-Sheıh kýrortynda demalý úshin eń qymbat baǵa 343 myń teńge shamasynda. Buǵan ushý baǵasy, transfer, otelde turý jáne tolyq tamaqtaný kiredi.
