Petropavl men Reseıdiń kórshi oblystary arasynda elektr poıyzdar júretin boldy

PETROPAVL. QazAqparat – Petropavldan Reseıdiń kórshi óńirlerine eki elektr poıyzy jiberilmek. Turǵyndar arasynda suranysqa ıe baǵyt indetke baılanysty toqtap qalǵan edi, dep habarlaıdy QazAqparat tilshisi.

Soltústik Qazaqstan oblysynyń ákimi Qumar Aqsaqalov áleýmettik jelidegi jeke paraqshasynda Ońtústik Oral temir jolynyń basshysy Igor Rıazanovpen júzdeskenin jazdy. Kezdesýde temirjol salasyn damytý jáne eki el arasyndaǵy jolaýshylar tasymaly máseleleri talqyǵa túsken.

«Petropavl-Esilkól» jáne «Petropavl-Petýhovo» elektr poıyzdarynyń qozǵalysyn jandandyrýǵa kelistik. Esterińizge sala keteıin, olardyń qozǵalysy 2 jyl buryn pandemııaǵa baılanysty toqtap qalǵan edi. Kóliktiń bul túri shekaralas oblystardyń turǵyndary arasynda suranysqa ıe.

Sondaı-aq kezdesýde «Maslodel» seriktestigi salyp jatqan maıdy ekstraktsııalaý zaýyty úshin qajetti kirme temir joldy salý máselesi talqylandy. Ol oblys úshin óte mańyzdy óndiris oshaǵy, 15 mlrd teńge ınvestıtsııa tartylyp jatyr. 200-den astam jańa jumys orny ashylady. Bul jobany tez arada bekitýge kelistik», - dedi Qumar Aqsaqalov.

Qazirgi ýaqytta Petropavldan poıyz arqyly Reseıdiń Máskeý, Rostov-Na-Doný, Sankt-Peterbýrg, Samara, Novosibir, Saratov sııaqty birqatar qalalaryna barýǵa bolady.