Petropavl men Qyzyljar aýdanynda sý tasqyny qaýpi seıiler emes
ASTANA. KAZINFORM — Soltústik Qazaqstan oblysyndaǵy Sergeev sý qoımasynda sý deńgeıi qaıta kóterile bastady. Bul týraly Soltústik Qazaqstan oblysy ákiminiń orynbasary Qanat Dúzelbaev aıtty.
«Oblystaǵy sý tasqyny jaǵdaıy áli de kúrdeli bolyp otyr. Sergeev sý qoımasynda sý tasqynynyń alǵashqy tolqyny júrip ótkennen keıin sýdyń erneýden asyp tógilýi 257 sm-ge deıin tómendedi. Qazirgi ýaqytta ekinshi sý tolqynynyń kelýine baılanysty sýdyń qaıtadan kóterilýi jáne saǵat 10:00-degi jaǵdaı boıynsha erneýden asyp tógilýi - 265 sm. Sý deńgeıiniń kóterilýi — 21 sm. Qyzyljar aýdany men Petropavl qalasynda jaǵdaı kúrdeli. Qyzyljar aýdanynyń eldi mekenderi jáne oblys ortalyǵynyń Podgora, Kojevennyı, Zarechnyı, Kosogor shaǵynaýdandary sý astynda qaldy. Sý tasqyny bastalǵannan beri oblysta 2 886 úıdi sý basqan bolatyn. 2 639 úı áli sý astynda qalyp otyr», — dedi ol ortalyq kommýnıkatsııalar qyzmetindegi brıfıngte.
Onyń dereginshe, oblys boıynsha 14 388 adam evakýatsııalandy. Evakýatsııa pýnkterine 1 073 adam ornalastyryldy.
Olar úsh mezgil ystyq tamaqpen, qajetti zattarmen qamtamasyz etildi.
«Búginde 149 otbasyna birrettik áleýmettik kómek tólendi. Soltústik Qazaqstan oblysyna Astana, Almaty qalalarynan, Shyǵys Qazaqstan, Qyzylorda, Jambyl, Pavlodar, Aqmola oblystarynan, sonymen qatar Omby qalasyndaǵy qazaq dıasporasynan 470 tonna gýmanıtarlyq júk kelip jetti. Ol kómek ázirlengen kestege saı bólinip jatyr. Qabyldaý pýnkteri men gýmanıtarlyq kómekti berý arasyndaǵy jumys jolǵa qoıylǵan», — dedi Qanat Dúzelbaev.
