Petropavl memqyzmetshileri 700-ge jýyq alma aǵashyn otyrǵyzdy
PETROPAVL. QazAqparat - Qazaqstan Respýblıkasynyń memlekettik qyzmet organdarynyń 20-jyldyǵyn merekeleý aıasynda Memlekettik qyzmet isteri jáne sybaılas jemqorlyqqa qarsy is-qımyl agenttigimen «90 myń aǵash» aktsııasy uıymdastyryldy, dep habarlaıdy atalmysh organnyń baspasóz qyzmeti.
Bul respýblıkalyq aktsııa elimizdiń qalalary men óńirlerin kógaldandyrý isinde 90 myń memlekettik qyzmetkerlerdi jumyldyrýǵa baǵyttalǵan. Árbir memqyzmetshi jańa aǵash egýge mindetti.
Keshe, 12 mamyr kúni Memlekettik qyzmet isteri jáne sybaılas jemqorlyqqa qarsy is-qımyl agenttiginiń SQO boıynsha departamentiniń jáne Soltústik Qazaqstan oblysy máslıhatynyń qyzmetkerleri «90 myń aǵash» aktsııasyn júzege asyrýǵa óz úlesterin qosty.
Petropavl qalasynyń Beıbitshilik kóshesinde 700-ge jýyq alma aǵashy egildi.
Jalpy, bıylǵy jyly memlekettik qyzmet organdarynyń 20 jyldyǵyna oraı basqa da aýqymdy is-sharalar ótkizý josparlanǵan. Onyń ishinde SQO memlekettik ister departamenti uıymdastyratyn «20 ıgi is» qaıyrymdylyq aktsııasy da bar.
