Petropavl mektepterine jasandy ıntellekt júıesi bar beınekameralar qoıylyp jatyr
PETROPAVL. KAZINFORM – Balalardyń qaýipsizdigi úshin Petropavlda pılottyq joba qolǵa alyndy. Jasandy ıntellekti bar beınekameralar býllıng belgilerin birden anyqtaıdy.
Soltústik Qazaqstan oblysy bilim basqarmasynyń málimetinshe, pılottyq jobaǵa birinshi bolyp Petropavldaǵy Á.Bókeıhanov atyndaǵy №25 jalpy bilim beretin orta mektepte qosyldy. Qazir bilim ordasynda osyndaı segiz kamera jumys istep tur.
- Bıyl qarasha aıynyń sońynda bizdiń mekteptegi beınekameralarǵa «Protector AI» júıesi qosyldy. Onyń ereksheligi – balalar arasyndaǵy qaqtyǵysty birden anyqtaıdy. Nebári 8 sekýnd ishinde jazba júıeni jasaýshylar jáne mektep dırektorlary otyrǵan Telegram kanalǵa túsedi. Sol sátten bastap psıhologııalyq qyzmet mamandary - biz mán-jaıdy anyqtaýǵa kirisemiz, balalardy, synyp jetekshilerin shaqyryp, bul oqýshylardyń arasyndaǵy oıyn ba, álde agressııa, kúsh kórsetip qorlaý ma ekenin bilemiz, - deıdi mekteptiń áleýmettik pedagogy Baǵlan Jaqypova.
Bir aıdyń ishinde osy júıe arqyly Telegram kanalǵa birneshe beınejazba kelip túsken. Teksere kele, býllıng faktisi rastalmady.
- Bul júıe mektepterge kerek, óıtkeni synyp jetekshileri, ustazdar keıde oqýshylar arasyndaǵy kıkiljińdi kórmeı qalýy múmkin. Al bul jasandy ıntellekt bar beınekameralar táýlik boıy jumys isteıdi. Sondyqtan balalar bir sát qaraýsyz qalmaıdy. Qandaı da bir jaǵdaı bolyp qalsa biz der kezinde kórip, máseleniń aldyn alamyz, - deıdi Baǵlan Jaqypova.
Qaýipsizdik júıesin elordalyq kompanııa usynǵan. El boıynsha SQO-da tájirıbeden ótip jatyr.
- Bul júıeni engizý ár mekteptiń óz erkinde. Qazir mektepterge oqýshy sanyna baılanysty qarjylandyrý beriledi, ıaǵnı qorlary bar. Sol qordan aqshany bólip, bul júıeni satyp alady. Nátıjesi mektep dırektorlarynyń jıynynda kórsetildi. Birqatary jańa jyldan bastap óz mektepterine qoıatyn boldy, - deıdi SQO bilim basqarmasynyń baspasóz hatshysy Ásel Orazbaeva.
Esterińizge salaıyq, byltyr aqpan aıynda Petropavlda 9-synyp oqýshysy mektepke qarýlanyp kelip, birneshe balany baltamen jaraqattaǵan edi.
