Petropavl mektepterinde oqýshylar «adaldyq elshisin» saılaıdy
PETROPAVL. QazAqparat – Petropavlda qalanyń orta bilim beretin mekemeleri oqýshylarynyń ózindik basqarma prezıdentteri men belsendileri jınalyp, alda bolatyn saılaý barysyn talqylady, dep habarlaıdy QazAqparat tilshisi.
Sybaılas jemqorlyqqa qarsy is-qımyl agenttiginiń SQO boıynsha departamenttiń jetekshisi Ernar Baıanǵazın oqýshylarmen kezdesti. Jıyn barysynda balalarǵa «Akademııalyq adaldyq saıasaty» jobasy jaıynda aıtyldy. Basymdyq aldaǵy saılaýǵa berildi.
«Eń aldymen sender adaldyq pen parasattylyqtyń úlgisi bolyp, óz dostaryń men partalastaryńa osy qasıetterdi nasıhattaýlaryń kerek. Al senderge ustazdaryń, Sybaılas jemqorlyqqa qarsy qyzmette qurylǵan Adaldyq jáne preventsııa basqarmasy kómektesýge ázir», - dedi Ernar Baıanǵazın.
Shara aıasynda balalarmen kezdesýge Petropavl qalalyq ardagerler keńesi tóraǵasynyń orynbasary Imangeldi Táttibaev jáne Petropavl qalalyq qoǵamdyq keńesiniń tóraǵasy Baqytjan Sámıeva keldi.
«Sender er jetesińder, birneshe jyldan keıin elimizdegi kásiporyndardy, mekemelerdi sender basqarasyńdar. Sol sebepti qazirden bastap adal ómir súrýge tyrysyńdar. Óıtkeni, jemqorlyq – kez-kelgen memlekettiń jaýy», - dedi Imangeldi Táttibaev.
Kezdesý sońynda qatysýshy oqýshylar kóshbasshylyq qasıetterin damytýǵa múmkindik beretin trenıngke qatysty. Balalar jınalǵan halyq aldynda durys sóıleýdi, ózin ustaýdy jáne tanystyrýdy meńgerýi úshin túrli tapsyrmalar berildi. Sondaı-aq jaǵdaıǵa baılanysty qalaı áreket etý qajettigi sóz bolyp, fızıologııalyq, psıhologııalyq múmkindikterin baǵalaıtyn jattyǵýlar oryndaldy.
Oqýshylar joǵary belsendilik kórsetip, jaýapkershilikten qashpaıtyndyqtaryn jáne kez-kelgen bastamalarǵa ashyqtyǵyn bildirdi.
