Petropavl mektebinde 89 mln teńge jymqyrylǵan: býhgalter men muǵalim sottaldy
ASTANA. KAZINFORM — Petropavl qalasyndaǵy №42 orta mekteptiń býhgalteri men muǵalimi bıýdjet qarajatyn jymqyrǵany úshin 7 jáne 8 jylǵa bas bostandyǵynan aıyryldy. Olar 2019 jylǵy tamyzdan 2024 jylǵy tamyzǵa deıin jalpy somasy 89 mln teńge bolatyn qarajatty zańsyz aýdarǵan.
Soltústik Qazaqstan oblysynyń prokýratýrasy júrgizgen qadaǵalaý jumystary barysynda mektep býhgalteriniń bıýdjet qarajatyn júıeli túrde jymqyrý faktileri anyqtaldy.
Tekserý nátıjesinde 2019 jylǵy tamyzdan 2024 jylǵy tamyzǵa deıin bilim berý uıymy qyzmetkerlerine jalaqy túrinde jalpy somasy 89 mln teńge aqsha zańsyz aýdarylǵany belgili boldy. Onyń ishinde mektep muǵalimderiniń biriniń qatysýymen 25 mln teńge kóleminde zalal keltirilgen.
Atalǵan faktiler boıynsha Petropavl qalasynyń prokýratýrasy Qazaqstan Respýblıkasy Qylmystyq kodeksiniń 189-baby 4-bóliginiń 2) tarmaǵynda kózdelgen qylmystyq quqyq buzýshylyq belgileri boıynsha sotqa deıingi tergep-tekserýdi bastady.
— 2026 jylǵy 25 mamyrda Petropavl qalalyq sotynyń úkimimen býhgalter men muǵalim kináli dep tanyldy. Sot olardy materıaldyq jaýapkershilikke baılanysty laýazymdardy atqarý quqyǵynan 10 jyl merzimge aıyra otyryp, tıisinshe 7 jáne 8 jylǵa bas bostandyǵynan aıyrýǵa úkim shyǵardy. Sot úkimi zańdy kúshine endi, — delingen habarlamada.
Osyǵan deıin Soltústik Qazaqstan oblysynyń Esil aýdanynda bıýdjet qarajatyn jymqyrǵan aýyldyq okrýg ákimdikteriniń býhgalterlerine qatysty sot úkimi shyqqany belgili boldy.
