Petropavl mektebindegi oqıǵa - Mınıstrlik tekseristiń aldyn ala qorytyndysyn jarııalady
«Bul - bilim berý uıymdaryndaǵy nusqaýlyqtardyń tolyq saqtalmaýy, lıtsenzııasy bar kúzettiń joqty, týrnıketterdiń bolmaýy men mekteptiń ishine kirgizý rejımi boıynsha talaptardyń saqtalmaýynan. Ótkizý rejımine jaýapty qyzmetkerler bilim berý uıymdaryna ákelýge tyıym salynǵan zattardy anyqtaý boıynsha jetkilikti quzyretterge ıe bolmaǵan. Sondaı-aq, bilim berý jáne densaýlyq saqtaý uıymdary arasynda sektorlyq ózara is-qımyldyń joqtyǵy belgili», - dedi Balalardyń quqyǵyn qorǵaý komıtetiniń basshysy Oqý-aǵartý mınıstrliginiń shuǵyl keńesinde.
Nasymjan Ospanova vedomstvo bul jaǵdaı boıynsha oblysqa ádistemelik jáne psıhologııalyq kómek kórsetýdi jalǵastyratynyn atap ótti.
«Balalardyń quqyǵyn qorǵaý komıteti Memleket basshysynyń tapsyrmasyna sáıkes, toqsan saıyn bilim berý obektilerindegi qaýipsizdiktiń jaı-kúıine monıtorıng júrgizedi. Budan basqa mınıstrdiń tapsyrmasy bar. Kelesi aptadan bastap 1 aı boıy bala quqyqtary jónindegi óńirlik ýákilderdiń, sarapshylardyń, úkimettik emes uıymdardyń qatysýymen biz barlyq el boıynsha bilim berý uıymdarynda qaýipsizdikti uıymdastyrý máseleleri boıynsha tekserý júrgizemiz», - dep túıindedi Nasymjan Ospanova.
Eske salsaq, keshe Petropavlda 9 synyp oqýshysy mektepke balta men pyshaq ala kelip, 3 oqýshyny jaraqattady. Keıin zardap shekken eki balaǵa ota jasaldy.
Bul oqıǵaǵa qatysty túsinikteme bergen Premer-Mınıstrdiń orynbasary Altaı Kólginov atalǵan mektepte lıtsenzııasy bar kúzet qyzmeti bolmaǵanyn málim etti.
