Petropavl mektebindegi oqıǵa: bilim ordasynyń ákimshiligi qalaı áreket etti
ASTANA. QazAqparat – Soltústik Qazaqstan oblysy ákiminiń birinshi orynbasary Marat Tasmaǵanbetov Petropavl mektebinde oqýshylarǵa jasalǵan shabýyl kezinde mektep ákimshiliginiń qalaı áreket etkenin aıtty, dep habarlaıdy QazAqparat tilshisi.
«Mektep ákimshiligi jedel áreket etti. Olar jedel járdem shaqyryp, dabyl túımesi arqyly sıgnal berdi. 3 mınýt ishinde kúzet agenttiginiń kezekshi toby keldi. Zardap shekkenderge mektep dárigerleri alǵashqy medıtsınalyq kómek kórsetti», - dedi Marat Tasmaǵanbetov Oqý-aǵartý mınıstrliginiń shuǵyl keńesinde.
Ákimniń orynbasary zardap shekken 3 adamnyń ekeýi aýrýhanaǵa jatqyzylǵanyn aıtty. Qazirgi ýaqytta olar reanımatsııadan jalpy palataǵa aýystyrylǵan. Balalardyń jaǵdaıy qanaǵattanarlyq.
Eske salsaq, keshe Petropavlda 9 synyp oqýshysy mektepke balta men pyshaq ala kelip, 3 oqýshyny jaraqattady. Keıin zardap shekken eki balaǵa ota jasaldy.
Bul oqıǵaǵa qatysty túsinikteme bergen Premer-Mınıstrdiń orynbasary Altaı Kólginov atalǵan mektepte lıtsenzııasy bar kúzet qyzmeti bolmaǵanyn málim etti.
