Petropavl mektebinde qarýly shabýyl kezinde zardap shekken oqýshylar aýrýhanadan shyǵaryldy

ASTANA. QazAqparat – Petropavlda qurdastarynyń tarapynan qarýly shabýylǵa ushyraǵan oqýshylar aýrýhanadan shyǵaryldy. Bul týraly Úkimet otyrysynda Soltústik Qazaqstan oblysynyń ákimi Aıdarbek Saparov aıtty, dep habarlaıdy QazAqparat tilshisi.

Otyrysta Premer-Mınıstr Álıhan Smaıylov óńir basshysynan: «Jaqynda oqýshylarǵa jasalǵan shabýyldan keıin mektepterdiń qaýipsizdigin kúsheıtý úshin qandaı sharalar qabyldadyńyzdar?» - dep suraǵan edi.

«Birinshiden, balalardyń jaǵdaıy týraly qysqasha baıandaýǵa ruqsat etińiz. Búgingi kúni olardyń barlyǵy aýrýhanadan shyǵaryldy. Jaǵdaılary ortasha. Dárigerlik konsýltatsııalyq komıssııa úıde kútýdi usyndy. Másele turaqty baqylaýda», - dep jaýap berdi oblys basshysy.

Aıdarbek Saparovtyń atap ótýinshe, oblysta 630 bilim nysany, onyń ishinde 465 mektep bar. Mektepterde 75 myń bala bilim alady.

«Uıymdar beınebaqylaý júıesimen qamtylǵan. Petropavl qalasynda Polıtsııa departamentiniń Jedel basqarý ortalyǵyna talap etilgen barlyq 79 nysan qosylǵan. Aýdan ortalyqtarynda da kameralar polıtsııa bólimine shyǵarylǵan. Dabyl túımeleri 178 nysanda ornatylǵan. Sonymen qatar dabyl túımelerin qosymsha ornatý jumystary júrgizilip jatyr», - dedi ol.

Eske salaıyq, 13 aqpan kúni Petropavlda 9 synyp oqýshysy mektepke balta men pyshaq ala kelip, 3 oqýshyny jaraqattady. Keıin zardap shekken eki balaǵa ota jasaldy.