Petropavl mańynda qamys janyp jatyr
PETROPAVL. QazAqparat – Petropavldaǵy «Bereke» yqshamaýdanynda qamys janyp, qazirgi ýaqytta órt sóndirýshiler qyzyl jalynmen kúresip jatyr, dep habarlaıdy QazAqparat tilshisi.
Petropavldaǵy «Bereke» yqshamaýdanynda qamystyń órtengendigi týraly alǵashqy beınejazbalar aldymen áleýmettik jelide paıda boldy.
Jazbany taratqan turǵyndardyń aıtýynsha, osy aýdanda batpaqta ósken qamys jylda órtenedi. Ol órtengen saıyn jaqyn mańdaǵy jeke úı turǵyndarynyń záre-quty qalmaıdy eken. Bul joly da qalalyqtar órttiń úıge jaıylmaýyn qadaǵalap, órt sóndirýshilerdiń jolyn tosqan.
Soltústik Qazaqstan oblysy tótenshe jaǵdaılar departamenti baspasóz qyzmeti órtke qatysty málimet berdi.
Mamandardyń aıtýynsha, búgin saǵat 13.12 mınýt ketkende «101» nómirine Petropavldaǵy «Bereke» shaǵynaýdanynda qamystyń janyp jatqandyǵy jaıynda habarlama túsken. Saǵat 13:14 mınýt ketkende oqıǵa ornyna alǵashqy órt sóndirý bólimsheleri kelip, qyzyl jalynmen kúresti bastady. Qazirgi ýaqytta órt shamamen 1 ga aýmaqqa jaıylǵan. Ol jerde Petropavldyń 3 órt sóndirý bólimshesiniń 6 tehnıkasy men jeke quramnan 20 adam jumys istep jatyr. Jaqyn mańdaǵy úılerge keler qaýip joq.
