Petropavl mańynda 5 blokpost qoıylady
Petropavl qalasynyń ákimi Bolat Jumabekov búgin shuǵyl túrde onlaın brıfıng ótkizip, oblys ortalyǵynyń karantınge jabylýyna baılanysty túsinik berdi.
«Petropavlda epıdemıologııalyq ahýal kúrdeli. Naýryz, sáýir, mamyr aılarynda vırýs juqtyrǵandardyń sany Petropavlda nebári 26 bolǵan. Ótken táýlikte oblys ortalyǵynda KVI juqtyrǵan 24 adam tirkeldi. Sońǵy bir aptada aýyrǵandar sany 105-ke jetti. Qazirgi ýaqytta ınfektsııalyq statsıonarlar 43% -ke tolyq. Aýrýdyń taralýyn boldyrmaý jáne turǵyndardyń arasynda sanıtarlyq qaýipsizdikti qamtamasyz etý maqsatynda birqatar shekteý sharalary qoldanylady», - dedi Bolat Jumabekov.
Petropavl qalasynyń perımetri boıynsha 5 blokpost qoıylady. Olar Mamlıýtka qalasy, Beskól aýyly, Býlaev qalasy, Solnechnyı shaǵyn aýdany jáne Shahovskoe eldi mekeni baǵyttary boıynsha ornalasady.
«9 qarashada qala jabylady. Sol sebepti osy ýaqytqa deıin turǵyndar turǵylyqty
jerine shyǵyp nemese oralýlary qajet. Keıin, 5 jasqa deıingi balalardy qospaǵanda, tek PTR test nátıjesi arqyly kirip-shyǵýǵa bolady. Qala tirshiligin qamtamasyz etetin uıymdar, azyq-túlik, birinshi qajettilik buıymdaryn tasymaldaýshylar kedergisiz ótedi. Biraq qyzmetkerlerdiń tizimin jergilikti ákimdikke jiberý qajet. Blokposttar apattyq qutqarý qyzmetteri men jedel-járdem avtomobılderi úshin ashyq bolady. Qala ishinde turǵylyqty mekenjaıynan jumys ornyna deıin jáne keri qaıtý úshin jumys berýshiden anyqtama bolýy qajet. Qoǵamdyq kólikter tek dúısenbi-juma aralyǵynda saǵat 06.30-dan 22.00-ge deıin jumys isteıdi», - dedi Petropavl qalasynyń ákimi.
Bolat Jumabekovtyń aıtýynsha, Petropavlda medıtsınalyq uıymdar, azyq-túlik emes dúkender men bazarlar, azyq-túlik dúkenderi, qyzmet kórsetý jáne týrızm salasynyń nysandary, sport mekemeleri, qoǵamdyq tamaqtandyrý nysandary, bilim berý mekemeleri, halyqqa qyzmet kórsetý ortalyqtary men Call ortalyqtary jumystaryn jalǵastyrady.
Alaıda, olardyń jumys ýaqyty shekteýli bolmaq.
Sondaı-aq ol koronavırýske qatysty qalalyq ákimdikte call ortalyqtyń jumys isteıtinin eske saldy, oǵan 87152 35 00 17 telefon nómiri arqyly habarlasýǵa bolady.