Petropavl mańynda Esilmen kelgen mol sýdy burý úshin aınalma kanaldyń qurylysy bastaldy
PETROPAVL. KAZINFORM – Soltústik Qazaqstan oblysynda sý tasqynyna daıyndyq máselesi pysyqtaldy.
SQO ákimdigi baspasóz qyzmetiniń málimetinshe, oblystyq ákimdikte ótken jumys keńesinde tótenshe jaǵdaılar departamentiniń, «Qazgıdromet» RMK oblystyq fılıaly basshylarynyń jáne selektorlyq rejımde aýdan ákimderiniń baıandamalary tyńdaldy.
- Sý tasqyny – óńir úshin óte ózekti másele. Byltyrǵy jaǵdaıdyń qaıtalanýyna jol bermeý qajet. Daıyndyq jumystary úzdiksiz júrgizilýde: jóndeý jáne ınjenerlik jumystar bir kúnge de toqtaǵan joq, tipti qysta da jalǵasty, - dedi oblys ákimi.
Óńirde ınjenerlik jumys jospary aıasynda 109 is-shara atqaryldy. Onyń ishinde 8 qorǵanys bógeti nyǵaıtyldy, 80 km bógetter men úıindiler salyndy. Avtojoldarǵa 108 sý ótkizý qubyry men tıýbıngter ornatyldy. Al birinshi kótergish sorǵy stantsııasyn qaıta jańartý jumystary aıaqtalýǵa jaqyn.
- Petropavl sý toraby mańynda aınalma kanal qurylysy bastaldy. Bul Esil ózeninde sý deńgeıiniń kóterilýine jol bermeıdi. Oblys ortalyǵynyń shaǵyn aýdandaryn sý basýdan qorǵaý úshin artyq sýdy aldyn ala aǵyzý qarastyrylǵa, - dedi Ǵaýez Nurmuhambetov.
Al byltyr tasqyn sý shaıǵan Sokolovka jáne Bolshaıa Malyshka aýyldary mańynda ózen arnalarynyń túbin tereńdetý jáne jaǵalaýdy tazartý jumystary júrgizilip jatyr.
Petropavlda jáne 8 aýdandaǵy Esil ózeni men shaǵyn ózenderdiń 49 ýchaskesinde muz keptelisiniń aldyn alý jáne erigen sýdyń kedergisiz aǵýyn qamtamasyz etý úshin jarylys jumystary júrgiziledi.
- Qazir búkil oblys úshin jaýapty kezeń. Memlekettik organdar kúsheıtilgen jumys rejımine kóshti. Daıyndyq jumystary muqııat júrgizilýi tıis, ásirese ınertti materıaldardy, qaptardy jáne arnaıy tehnıkany aldyn ala ázirleý mańyzdy. Sondaı-aq, jergilikti turǵyndardyń pikirleri men usynystaryn eskerý qajet, - dedi óńir basshysy.
Aldaǵy ýaqytta aýdandarda keńester ótkizilip, negizgi mindetter men basym jumystar naqtylanbaq.
Buǵan deıin Shyǵys Qazaqstan oblysynda sý tasqynynyń aldyn alý úshin jasandy ıntellektti qoldanatyn jedel shtab qurylǵanyn jazǵan edik.