Petropavl mańynda 6 gektar aýmaqtaǵy órt tolyq oqshaýlandy
ASTANA.KAZINFORM — JM qyzmetkerleri órtti oqshaýlap, órttiń turǵyn úı massıvi men saıajaı ýchaskelerine taralýyna jol bermedi.
Petropavl qalasynda qatty turmystyq qaldyqtar polıgonynyń ar jaǵynda, Shahovskoe aýylynyń mańynda qurǵaq ósimdikter jandy.
Órt aýmaǵy shamamen 6 gektar. Órtti sóndirý jumystary ekpini sekýndyna 25 metrge deıin jetken qatty jelge, batpaqty jerge, sondaı-aq bıiktigi eki metrge deıin jetetin qalyń qurǵaq shóp pen qamys ósken alqaptarǵa baılanysty qıyndady.
Órtti sóndirý jumystaryna qosymsha quramynda 150 tonna sý qory bar órt sóndirý poıyzy tartyldy.
Órt sóndirýshilerdiń jedel áreket etýiniń arqasynda órt oqshaýlanyp, onyń turǵyn úı massıvi men saıajaı ýchaskelerine taralýyna jol berilmedi.
Zardap shekkender joq.
Aıta ketelik Petropavl mańyndaǵy órtti sóndirýge 110 maman men 30-dan astam tehnıkaa jumyldyrylǵany týraly jazǵan edik.
