Petropavl kóshesinde jalǵyz júrgen 5 jasar bala tabyldy
PETROPAVL. QazAqparat – Petropavl kóshesinde jalǵyz júrgen 5 jasar bala tabyldy, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavl turǵyny kóshede ózi jalǵyz júrgen 5 jasar qyzdy kórgen. Áıel búldirshindi úıine ákelip, birden polıtsııaǵa habar bergen.
Qyz óziniń, áke-sheshesiniń jáne inisiniń esimderin aıtqan. Biraq tegi men mekenjaıyn esine túsire almaǵan. Búldirshindi izdegen adam bolmaǵandyqtan polıtseıler ony kólikke otyrǵyzyp, qala turǵyny taýyp alǵan aýdanǵa ákelgen. Sol jerde qyz óz úıin tanyp, qolyndaǵy kiltpen kire beris esikti ashqan.
Keıin belgili bolǵandaı, otaǵasy túngi kezekshilikten keıin uıyqtap jatqan. Al anasy qyzyn esik aldyna oınaýǵa jiberip, ózi terezeden anda-sanda baıqap otyrǵan. Úıdegi nárestege kóńil bólip jatqanda daladaǵy qyzyn kózden tasa etip alǵan. Polıtseıler kelgende erli-zaıypty qyzdaryn izdeýge shyǵaıyn dep jatyr eken. Anasynyń aıtýynsha, qyzy buryn aýladan uzap shyqpaǵan.
«Bul otbasy polıtsııanyń esebinde joq. Ýchaskelik ınspektor ata-anamen profılaktıkalyq áńgime júrgizdi. Al qala turǵyndaryn eskertkimiz keledi: balanyń aty bala, oıynǵa salynyp, úıden alystap ketýi múmkin. Jalǵyz jiberý – qaýipti. Sondaı-aq balanyń qaltasyna aty-jóni, mekenjaıy jáne telefon nómiri jazylǵan qaǵazdy salyp qoıǵan jón. Al jalǵyz júrgen balany baıqap qalyp, onyń ómirine beıjaı qaramaǵan qala turǵynyna Petropavl qalalyq polıtsııa basqarmasynyń basshylyǵy alǵys aıtady», - dedi Petropavl qalalyq PB jergilikti polıtsııa qyzmeti bóliminiń bastyǵy Rýstam Sadýlov.
