Petropavl kóshesinde «Gazel» kóligi traktorǵa soǵyldy
PETROPAVL. QazAqparat – Petropavlda «Gazel» kóliginiń júrgizýshisi aldynda kele jatqan kólikti basyp ozamyn dep traktorǵa soǵylyp, oqıǵa ornynan qashyp ketti, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, oqys oqıǵa 12 maýsym kúni saǵat 22.00 shamasynda bolǵan.
«GAZ 33021-212» avtokóliginiń 51 jastaǵy júrgizýshisi Jambyl kóshesimen Chelıýskın kóshesi baǵytynda kele jatyp, aldyndaǵy kólikti basyp ozbaq bolǵan. Alaıda qaýipsiz aralyqty saqtamaı bir baǵyttas John Deere traktoryna soǵylǵan. Traktor kran artyp alǵan eken. Kólik apatynan eshkim zardap shekken joq.
Tártip saqshylarynyń aıtýynsha, «Gazel» júrgizýshisi oqıǵa ornynan qashyp ketken. Alaıda izdeý sharalary aıasynda polıtseıler ony kóp uzamaı taýyp, júrgizýshige qatysty eki bap boıynsha ákimshilik hattama toltyrdy. Materıal sotqa jiberiledi.
«GAZ 33021-212» avtokóligi aıyp turaǵyna qoıyldy.
