Petropavl kóshelerin qardan tazartýda jasandy ıntellekt júıesi qoldanylady
PETROPAVL. KAZINFORM – Petropavlda kóshelerdi qys mezgilinde kútip ustaýǵa arnalǵan tehnıkanyń kórmesi ótti.
Іs-sharada Soltústik Qazaqstan oblysyndaǵy kommýnaldyq jáne jol qyzmetteriniń, energetıkalyq jáne avarııalyq-qutqarý bólimsheleriniń aldaǵy qysqa daıyndyǵy tekserildi.
Bıyl oblys joldarynda 232 jylytý pýnkti jumys isteıdi. Qardy shyǵaryp, joldardy ashýǵa myńǵa jýyq arnaıy tehnıka jáne 1 863 jumysshy jumyldyrylady.
Petropavldaǵy kóshelerdiń jalpy uzyndyǵy – 366 km. Joldardy qardan tazartý úshin bıyl ol 8 sektorǵa bólingen. Jaýapty uıymdar kúndelikti 170 arnaıy tehnıkany kóshege shyǵarmaq.
– Biz qaladan qardy shyǵarý qyzmetin tsıfrlandyrýdy josparlap otyrmyz, ıaǵnı jasandy ıntellekt qoldanylady. Baǵdarlama ázirlenip jatyr, shamamen 10-15 kún ishinde daıyn bolady. Ár tehnıka GPS navıgatormen qamtamasyz etiledi. Bul navıgatorlar jáne kameralar baǵdarlamaǵa qosylady. Osylaısha, tehnıkanyń qaı jerde jumys istep jatqanyn, qardyń qalaı jáne qandaı kólemde shyǵarylyp jatqanyn baqylaýǵa múmkindik týady, - deıdi Petropavl ákimi Serik Muhamedıev.
Qar tógetin polıgondarǵa da beınekameralar ornatylyp, barlyǵy birtutas tsıfrlyq júıege biriktiriledi. Endi shyǵarylǵan qar kólemin esepteý jumysyn jasandy ıntellekt atqarady. Qazirgi ýaqytta eki polıgon daıyn, onyń biri – rezervtik.
Buǵan deıin SQO joldarynda qansha qaýipti ýchaske bar ekenin jazǵan edik.